à Portinfé,
Saint Ou.
Moussieu l'Editeu,
J'ai 'té à bein d's êlections et j'ai yeu bein des surprînses dans l'couothant d'ma vie, mais j'n'ai jamais 'té si surprînt comme par le r'sultat dé l'êlection pour Sénateur, mêcredi. Même à ch'teu' j'ai d'la peine à l'craithe.
Pâslant d'êlections, Moussieu, j'n'ai jamais r'oublié ma preunmiéthe. Ch'tait ichîn à Saint Ou, et ch'tait une êlection pour Chantgni. J'n'avais pas pûs de six à sept ans, et je n'sais pas comment que j'me trouvit là. Ch'tait dans l'temps des deux partis, le Louothi et la Rose, et i' n'y'avait jamais pûs de trais ou quatre vouaix entre yeux. Ch'tait une tchestchion, prèsque tréjous, du parti tch'avait accaté le pûs grand nombre de viauds. Eh bein, chu jour-là, quand j'vînt sûs la scène, j'ni restit pas longtemps, car la grande mâjorité des elécteurs avaient bu trop, et dans l'mitan d'la route y'en avait deux tchi 'taient trop pliens pour se t'nîn d'but, êtrav'lés à s'entre camâillyi, avec une foule à les applaudi. J'fut prînt d'peux, et j'm'en r'fut bein vite siez-nous, couothant tout le long du qu'mîn, et bein décidé de n'aver rein à faithe avec autchune êlection dans l'temps à v'nîn. Chein tchi montre comme nou peut changi, car pour des années à ch'teu' j'n'ai pas mantchi une êlection ouesque j'avais l'drouait d'voter, et hardi hors de tchuthiôsité. Mais jamais d'vant chutte semaine j'avions 'té, la Merrienne et mé, à une êlection ensemblye pour voter du même bord.
Quand j'eûmes voté, la Merrienne se trouvit faillyie, et mé pas trop raide, car à m'n âge je n'peux pas marchi comme je faisais, et y'a une bouonne distance du Portinfé à la Salle Parouâissiale. J'éthais voulu entré à l'auberge pour un p'tit raffraichissement, mais la Merrienne ne voulit pas y mettre les pids, et à la fin ou' persuadit un certain Prîncipa d'Pâraisse de nos rapporté siez-nous. Ch'est un homme tchi n'touche jamais une goutte de litcheu, et tchi n'a jamais fumé. Ma femme le considèthe un vrai modèle, mais y'a des hardelles et même des femmes mathiées tchi savent le contraithe. Même à Saint Ou. Moussieu, nou-s-éthait bein d'la peine à trouver un homme parfait.
À ch'teu', Moussieu, y'a des tchestchions tchi s'présentent. À qu'menchi pourtchi que même en Ville le Député Dupré fut battu dans châtchun des trais Districts, et que dans la Campagne la seule pâraisse tchi li donnit une mâjorité 'tait Saint Louothains. Sans doute, le Sieur Dupré se fiait tch'il éthait le support des hôteliers et de touos l's autres întérêssis dans l'tourisme. Là, i' s'trompit, car les hôteliers ne deshallites pas, et nou n'comprend pas chonna. Ch'est presque seux que l'Député Venables ne s'attendait pas dé faithe si bein à Saint Hélyi. Quant à Saint Louothains, la Merrienne dit que ch'est la pâraisse ès Lé Mèrquands, et qu'après tout une mâjorité de vingt-quatre n'est pas grand'chose, mais oulle étha tchiquechose à dithe à ses nombreux couôsîns tchi d'meuthent dans la pâraisse, la préchaine fais qu'oulle îtha par là. J'voudrais être là quand ou' rencontrétha le John Baudains, tchi à chein qu'nou ouait, a décidé de se r'tither à la fîn d'chu mais, mais i' n'faut pas s'y fier, car il a dêjà changi d'idée pûs d'une fais, et i' pouôrrait l'faithe ocouo une fais. Jé crais, quand-même tch'il en a yeu assez et qué d'vant long les elécteurs éthont à chouaisi un nouvieau Connêtablye.
Y'a une autre chose tchi m'troubliéthait si j'tais ocouo întérêssi dans la politique et ch'est d'vaie tant d'elécteurs rester siez-yeux le jour d'une împortante êlection car après tout, Moussieu, si nou n'prend pas la peine de voter pour un Sénateur, nou n'peut pas l'bliaumer si, une fais êlu, i' fait des bêtises dans l's Etats. L'êlection de chutte semaine ne change rein quant à chonna, mais i' m'semblye que la grande mâsse des elécteurs de l'Ile ne l'réalisent pas. Y'a ocquo la même nombre d'elécteurs dans la Chambre, autant de comités, méme pûs, et la méme capacité pour passer des louais de toutes sortes, bouonnes ou îndifféthent ou mauvaises, et quand à mé j'peux vaie le temps v'nîn quand Jèrri ne s'sa pas si prospèthe comme à ch'teu', et que les taxes doubliéthont. Quand j'en pâsle à la Merrienne, ou m'dit que j'si un vièr roupilleux, tchi dev'thait r'mercier la Providence pour sa bonté, et aller à la chapelle pûs souvent, et p't'être. Moussieu, qu'oulle a raison. Mais y'a un r'mède que j'ai tréjous trouvé salutaithe et efficace, et quand j'éthai fini chutte lettre ichîn, j'm'en vais d'mandé à la bouonnefemme d'ouvri l'armouaithe et de bèthe un p'tit vêrre de chu r'miède-là à la santé du Sénateur Venables, et j'm'attends qu'ou n'ditha pas nennîn, car, si nou la prend du bouon bord, oulle est de bouon-tchoeu, la vielle.
Pour changi d'sujet pour le moment, Moussieu, sans doute ou-s-avez veu dans la “Post” que ch't année, nos nouvelles patates ont 'té vendues d'l'autre bord à septante louis par tonné, ou ch'est-à-dithe un total de trais millions. Ch'est une grôsse somme, mais chein que j'voudrais saver ch'est tchi proportion de chais trais millions s'en va s'trouver dans les pouchettes de nos fermiers, et tchi proportion tch'îtha pour transport, commission et d'autres dêpenses. Quand nou sétha chonna nou pouôrra aver tchique idée du profit pour les fermiers, mais pas d'vant. Dans l'entre-temps, les bricolis s'en veinnent de jour en jour, et i' pathaît que pour de bouonnes têtes y'a tout-plien de d'mande, et un bouon prix. Quant ès flieurs, ch'est à peu près la même boutique, et nou peut vaie à ch'teu' que les produits d'la têrre en Jèrri peuvent péyi si l'miyeu et seulement l'miyeu est envié en Angliétêrre.
I' n'faut pas que j'oublie que j'ai r'chut une lettre du Hedley James Mailliard, tch'a 'té visité les grandes fermes en Améthique ouesque y'a des jèrriaises, et tch'est à ch'teu' en Australie, s'i' n'a pas bouogi d'là. I' m'dit qu'au pûs grand “show” en Australia, ouesque y'avait pâssant trais chent d'bêtes, et ouesque i' 'tait à jugi, la vaque tchi fit l'championnat 'tait yunne des pûs belles tch'il aie jamais yeu, et que n'y'avait pas une faillie clâsse dans tout l' “show”. I' dit étout que pour un seul homme à jugi un patheil “show” est une djobbe, et j'n'ai pas d'peine à l'craithe. J'avions êprouvé chonna à Springfield une année, mais la grande mâjorité des fermiers 'tait contre, et reste contre au jour d'agniet. Le Sieur Shepard, tchi 'té secrétaithe dans l'temps, était en faveur d'aver un seul juge tout travers, mais y'avait trop d'opposition, et dépis chu jour-là j'n'avons jamais êprouvé un change du vièr système, mais pour mé j'voudrais ocquo vais les juges des sweepstakes et des championnats aver lûs fais à bèthe et lûs gammes de “nap” ou dominos, tandis qu'les clâsses étaient jugies et pas d'vant. J'me r'souveins que d's hommes comme le John Le Ruez et l'grand Frainque Le Brô approuvaient hardi d'chu système-là et maint'naient qu'un juge viyait pûs cliait après tchiques vêrres de litcheu. Je n'sais pas si ch'est vrai!
Pour en fini agniet, Moussieu, j'si content d'vos dithe que la Merrienne a ouvert l'armouaithe, et que j'avons bu un p'tit vêrre (deux pour mé) à notre sante et à la santé du Sénateur Venables.
À bétôt.
Ph'lip
Viyiz étout: