Les Pages Jèrriaises

This petrol business

How Merrienne would settle it

Monsieu l'Editeu,

J'tiomes à pâslé, la Merrienne et mé, l'aut' sé, au sujet d'la pétrole, et je r'mertchi qu'ben des gens s'trouv'thaient ben embêtés.

"Sans doute," ou s'fit, "mais quant à hardi v'la tchi n'lûs f'tha pas d'ma d'resté siez yeux un mio pûs tch'y n'font. Y'a ben trop d'hommes mathiés, même ichin à Saint-Ou tch'y sont à galvaudé ouêsque y n'ont qu'faithe à ben près touos les siers."

"Ch'est par affaithe," j'ly dit. "Ils ont tait en travas tout l'jour et n'ont pas yeu l'temps."

"Va conté chonna à ta grand'mèthe," s'fit la Merrienne. "Y'a une chose, Ph'lip; j'voudrais tch'y m'donn'nais la djobbe d'la distribué, chutte pétrole."

J'me mint à rithe. "Ma pouore vielle," j'l'y dit, "tu n'séthais pas iou qu'menchi."

"Si fait," ou dit, "j'séthais ben iou qu'menchi et iou fini étout. Che s'sait fait dans p'tit d'temps."

J'ly d'mandit de m'dithe comment qu'ou s'y prendrait. "Tu'en donn'nais tout plien à la police, sans doute?"

"La police!" ou s'fit. "Ah, mais, nouffé-djà. Une démié-pinte la s'maine au tout pûs pour les Chantgniers, et rain du tout pour les officiers d'Connêtablye. Autrement nou les vêrrait à gallopé d'un but à l'autre de l'île touos les siers faisant la mine tch'ils avaient des causes."

"Mais, ma pouore Merrienne," j'l'y dit, "y faut tch'y faichent lûs d'vé, nos Chantgniers, autrement l'Protchutheux pouorait les mettre en bouâite."

"Ne m'conte pas d'tan gniolin," ou s'fit. "Par chen qu'j'en vait, mé, un Chantgni n'a qu'a dithe à sa femme tch'il a une cause, et le v'la hors. Pûs tard nou vait sûs la gâzette que l'affaithe avait tait arrangie amicablyement. J'n'aime pas toute ch't'amiêtchi-là, mé. Y'en a un mio trop d'nos jours ouêsque y n'dév'thai pas s'en trouvé."

"Tu n'est pas juste à notre honothablye police," j'l'y dit. "Mais enfin; les Recteurs, ach'teu, en éthaient-t'y?"

"Ah mais oui, les chiers. Chent gallons la s'maine au tout mains."

"Et pourtchi, chonna?"

"Méts-té à la piéche du nôtre tch'a la djobbe de condithe touos ses pârâissiens sûs la bouonne route. Crai-tu tch'y peut l'faithe à pid?"

"Ah, damme," j'l'y dit, "s'y s'met dans la tête de vîsité rédguliéthement touos les Saint-Ouennais, sans pâslé des Saint-Ouennaises, tch'y sont sûs l'mauvais qu'min, jamais n'le f'tha avec chent gallons. Donne-y'en mille, pour être sûs l'bouon bors. Mais ach'teu tchêsque tu f'thais pour chais pouôres Angliais tch'y d'meuthent si lien d'la ville?"

"Pas une goutte pour yeux," dit la Merienne; "pas seulement une demié-goutte. Tch'ils aillent à pid. V'la tchi lûs f'tha du ben!

Ph'lip
6/12/1947
 

Viyiz étout:

 

Les Pages Jèrriaises