Moussieu l'Editeu,
Jeudi matin, après avé liu votre gâzette la Merrienne me r'gardit à travers ses lunettes et voulit savé sis l's'Etats 'taient fôs.
"Mais ma pouôre Merrinne," j'l'y raiponnit, "est-che-là d'tchi mé d'mandé? Et est-che-là la manièthe de paslé d'chais mêssieux tch'y nos gouvernent si admithablyement. Tu dév'thais savé mûs."
"Ah! ou s'fit, "J'vé ben qu'tu n'as pas liu la gâzette."
"Ben seîx," j'l'y dis, "que je n'l'ai pas liue. Ch'est la ême chose touos les matins. Tu la gaffe la boufflye d'gâzette, et té v'la assise sûs tan sofa à la liéthe pour une heuthe de temps. Mais tchèsque y'a d'sûs agniet donc tchi t'fait mârri?"
"Y'a chennechin," ou m'raiponnit, "que d'nos jours les Etats passent lûs temps à gaspillyi les sous du publyic. Aut'fais quand un Président d'comité d'mandait pour chinq chents louis y'avait tout-d'suite du brit, et nou l'y disait que n'y'avait q'quatre sous à la banque, mais ach'teu n'y'a pas un seul membre t'chy n'peut pus attrapé vingt mille louis ou même pûs sans qu'personne diche nânin. Ch'est abominablye! Hélas, ouêsque notre pouôr petit Jêrri s'en va."
J'm'en fut mâté tchiques câsses de patates, mais y n'y brûlait pas dans l'soyi, et don dans les onze heuthes j'r'entrit pour une tâsse de café, pour mé rêcaûffé, et en même temps liéthe la gâzette.
"Eh ben," s'fit la Merrienne, en d'scendant. "Es-tu de m'n'avis achteu qu'tu'as liu?"
"Oui." j'raiponnit, "chutte fais bouonefemme, tu'as raison. Je sommes d'accord té et mé. Nos Etats ont perdu la tête, et si chonna continnue, Jêrri pouôrra bétôt réuni ses créanciers. Mais chen tchi m'êtonne le pûs ch'est d'vais les Connêtablyes et les Députés d'la campagne dithe oui à tout. Ch'est incriyablye."
"Tu peux l'dithe," qu'ou s'fit." Quand il est tchestchon d'un êlection, les candidats vos disent trejous tch'y sont hardi en faveur de l'êconomie, mais une fais dans l's'Etats ch'est une difféthente histouéthe. Y n'pensent qu'à dêpensé."
"Véthe," j'm'accordit, "et chonna pour deux raisons. A qu'menchi y n'osent pas opposé un Juré Justicier, épis y savent ben que ch'n'est pas lûs propres sous, mais les sous du publyic tch'y dêpensent. R'garde par exemplye les tchînze chents louis par an pour le docteu d's'Etats. Et y'en a ben d'autres. Tout ch'qu'est d'mandé est accordé, épis nos mêssieux s'en r'vont siez yeux béthe lûs tais tout à fait contents."
"Sans doute," qu'ou s'fit, séquement, "mais va d'mandé à autchun d'yeux de t'prêté un couplye de ch'lins hors de sa pouchette, et tu verras tchêsque-y t'ditha."
"Ah, pour chonna, j'y'ai êprouvé d'vant agniet," j'l'y dit. "Trais dans un jour, une bordée. Y'un tch'y s'n'allait sorti dans san neu môteur avait grand r'gret, mais y 'tait à court de sous pour le moment, le deuxième v'n'ait d'perdre sa bouonne vaque, et n'savait pas ouêsque-y trouv'thait assez pour la rempliéchi, et l'traisième, que j'trouvit dans une auberge à convié une bouonne doûzaine de ses électeurs, n'éthait tait qu'trop content d'm'obliégi, mais il avait perdu chent louis sûs ses patates et même pûs sûs ses toumates, et dans deux-trais jours y s'sait forchi d'allé emprunté des sous à la banque. Y n'mé péyit pas même un verre de biéthe."
"Nan, mais si une semaine après dans l's'Etats tchi-tchun avait d'mandé chinq Millions pour bâti un nursing home pour les tchans et les cats tchi pouorraient tchais à la cherge d'la pâraisse, il éthait l'vé les deux mains pour," ou s'fit. "Quand ch'est les sous du publyic, y s'en fichent, nos membres. Et j'dis mé tch'il ewt grand temps qu'chonna change."
"P't'être ben," j'l'y dis, "mais comment s'y prendre pour le changi. J'n'y vait autchun r'miède, mé."
"Et mé je n'sis pas d'même," ou dit, "car j'en vé yun. Chen tchi nos faut dans l's'Etats ch'n'est pas d's'hommes tch'y nos ruinent, mais des femmes tch'y nos sauv'thont la vie. Et j'sis prête à m'mettre sûs les rans au premié jour."
Ph'lip
Morning News 30/11/1946
Viyiz étout: