à Portinfé,
Saint Ou.
Moussieu l'Editeu,
Une bein drôle dé chose, tch'éthait peut être tragique, s'arrivit siez-nous lundi au sé, et ch'tait là Merrienne tch'en n'tait la cause. Ou' s'en fut dans la salle de bain après l'tais, et une démieuthe après, ou s'mînt à faithe des brais qu'ou-s-éthait peut entendre de l'autre but d'la pâraisse. J'm'en fus vais tchèsqu'oulle avait, et ch'tait simplyement qu'ou n'pouvait pas se dêshaller d'chu fichu bain, car toutes les fais qu'oulle êprouvait, ou glissait d'un bord et d'l'autre, et n'avait pas la forche de se l'ver. Tout éthait 'té bein s'ou n'avait pas 'té bête assez de mettre la porte à la clié, chein tchi m'empéchait de v'nîn à s'n aide. I' n'y avait qu'une chose à faithe, dans les circonstances, et j'm'en fûs bein vit dehors pour trouver man gros marté. Une demie-doûzaine de raides coups, et la Merrienne se trouvit en liberté, car, après tout, Moussieu, j'crus que ma femme valait pûs qu'une neuve porte à la salle de bain. Ou n'm'a pas ocquo r'mercié pour aver sauver sa vie, mais ou m'a promînt de ne rentrer pas dans la salle de bain dans m'laîssi la clié, et ch'est tchiquechose.
Jé v'nons justement d'entendre d'la mort du Juré-Justicier Syvret, un bouan Jèrriais si jamais y'en a yeu yun. Il avait souffert hardi dans l'couothant d'sa vie, mais san couothage l'avait tréjous souôst'nu, et i' s'battit contre ses afflictions jusqu'à la fîn. Sarona, ouêsqu'i' d'meuthait, avait 'té la propriété dans les vièrs temps du fameux Philippe John Wesley L'Brun, tch'y fit un mauvais chouaix d'femme, et finit mînséthablyement.
Comme bein d'autres, Moussieu, j'fûmes bein surprînt, la Merrienne et mé, que l'Philip Lé Mèrquand appréchit si près dans l'élection l'autre jour. J'n'ai autchune doute que l'Sieur Cooper f'tha un raide bouan chef, et j'li souhaitons, la Merrienne et mé, tout ch'qu'i' y'a d'miyeu. Quant au Ph'lip Lé Mèrquand, i' n'a rein à se r'prochi mais pûstôt i' faut l'féliciter d'aver yeu tant d'support.
Chein que j'voudraimes saver à ch'teu', ma femme et mé, ch'est si l'Bill Perchard tchi s'est mînt candidat pour Sénateur, s'en va être oppôsé. Dans m'n opinion, Moussieu, il est l'homme pour la djobbe, car i' pathait aver toutes les qualificâtions. En autchun cas il est seux de deux vouaix siez Ph'lip et Merrienne de Portinfé. À Saint Pièrre, i' pâslent d'une êlection pour lé traisième Chantgni tchi lûs a 'té accordé.
J'n'ai pas peut aller à autchun des “shows”, mais par chein qu'nou m'en a dit, ch'est prèsque seux que y'étha hardi d'compétition pour l'championnat des vaques, et que, pas pour la preumié fais, i' pouôrrait être remporté par une g'niche r'nouv'llée. J'en doute quand-même, car parmi les jeunes vaques et étout les vielles, nou-s-entend qui y'étha tchiquechose d'extra. Pourvu que l'temps s'comporte, j'espèthe de m'trouver là, et j'pouôrrais vos dithe après m'n opinion des juges. Je n'm'attends pas d'être si întérêssi comme au “show” quand le Ken Richardson d'la Crouaix ès Mottes, gâgnit la coupe par la vouaix du bouonhomme Ph'lip Mouothant, lé “referee”, mais jamais nou n'sait, et j'espèthe d'pouver dithe après l' “show” que j'n'avais pas perdu man temps.
Les Êtats n'ont pas ocquo décidé tchèsqu'i' s'en va être fait de l'ancienne tour de La Rocco. Le Sénateur Krichefski est d'opinion qué la tour ne peut pas être r'pathée sinon à un bein grand couôtage, et pour une fais j'm'trouve en accord avec li.
À la fîn, et après d'longues années, les Êtats ont décidé d'accater Le S'tchée, la ferme au Sieur L'Masuthi à Saint Cliément. Ch'est pour y bâti des maisons, chein tch'est bein pûs utile qué d'laissi chu grand bêtchet à paitre ès coucous. Chein qu'nou n'comprend pas ch'est pourtchi qué là Êtats ont 'té si longtemps d'vant v'nîn à une décision tch'éthait peut être prînse y'a d's années.
À ch'teu', pour lé temps, Moussieu. J'avons yeu quatre ou chînq jours dé siète dé chaleu, et la Merrienne tch'avait dit qu'ou n'criyait pas grand'chose de Saint Martîn, a changi d'opinion compliétement. Il est vrai qu'oulle à yeu bein d'la peine à tchithier l'ieau pour arrôser san gardîn et qu'ou sue comme un boeu mème quand ou n'a prèsque rein sûs l'co mais ou dit qu'ou peut enduther chonna bein mûs que l'temps mouoillyi et venteux. Quant à mé, j'me mets à l'ombre souos yun des grands bouais l'long d'la route ou, grâce à man mâ dans l'dos, j'me r'pôse dans la tchuisine et j'pense ès bouons vièrs temps, quand nou-s-avait des s'maines et des s'maines de chaleu en êté, êt' d'la g'lèe et du gliéchon en hivé. Man vièr amîn du Bas d'l'Êta, prédit un hivé si fraid que les vielles gens s'en îthont au chim'tièthe bein vite. Mais ch'est un raide menteux, et s'i' crait tchi s'en va m'êfriter i' s'trompe car j'n'ai pas idée d'm'en aller ocquo pour une pôse. Après tout, yun d'mes grand'pèthes vêtchu jusqu'à pâssant nonante, et pourtant ch'est un vièr riboteux, tchi n'tait jamais sobre quand il avait les sous pour accater une boutelle, et yunne de mes grand'méthes appréchit d'chent ans, et éthait vêtchu pûs longtemps s'ou n'avait pas tchais dans l'feu en bouillant un ticlye pour faithe – nennin pas du tais, Moussieu, mais un vêrre câud, car oulle en avalait trais ou quatre par jour, la vielle.
J'm'en vais fini, Moussieu, car j'entends la Merrienne crier pour la clié d'la salle de bain. J'm'en vais li dithe que j'l'ai perdue, et j'vos promets que je n'la r'trouv'thait pas, ni agniet, ni autchun autre jour.
À bétôt.
Ph'lip
1962
Viyiz étout: