Moussieu l'Editeu
Hier au sé j'annoncis à la Merrienne que j'm'en allais m'prépather aller és `shows' d 'bêtes, comme dé couôtume. 'Vendrédi d'la s'maine tchi veint,' j'li dis, 'ch'est le p'tit show d'la Sociêté Agricole de St Hélyi, à Springfield et j'n'voudrais pas l'mantchi pour autchune chose, car là nou rencontre des viérs amins comme, par exemplye, le bouonhomme Ph'lip Mouothant, tch'a découvert, à chein qu'nou dit, une méd'cine tchi prolonge la vie jusqu'à chent ans et même pûs; étout l'Bill Le Brun et plusieurs autres. Quand l'show est fini i'vos donnent un raide bouon r'pas et j'ai tréjous trouvé tchitchun à m'ram'ner siez-me.'
'Et tu vais t'couochi,' ou dit d'une vouaix d'vinaigre, 'et l'prochain jour tu n'vaux pas quatre sous.'
Je n'prins pas d'avis a chutte r'mèrque-la, Moussieu, mais j'continuis, li disant que j'avais ouï qu'à St Louothains y'avait pûs d'entrées qu'jamais et qu'St Jean étout éthait d'fortes clâsses. J'ajouôtis que yun d'ses couôsins éthait une vaque à St Sauveux tchi v'nin d'un but pour la vaie.
'J'n'ai pas d'peine a l'craithe' ou dit. 'Les Richardsons n'ont pas l'habitude dé montrer des bricoles. Ch'est la seule famille tch'aie montré une vaque bouonne assez por remporter le championnat d'l'Ile à l'âge de douze ans. Et les Trais Pâraisses de l'Ouest, tchèsqu'en est?'
'Y'étha du monde, sans doute,' j'li dis, 'mais pour des champions je n'sais pas. Il est vrai que y'a un Richardson ichin à Saint Ou et un Jack A'Court and l'Frainque Avri et entre yeux i dév'thaient dêshaller tchiquechose pour châtchi l'Est mais i' faut attendre jusqu'au jour pour saver'
A ch'teu, Moussieu, j'avais dêja suggethé qu'la Merrienne n'était pas de trop bouonne humeur et j'm'en vais vos dithe pourtchi. J'avais liut dans une gâzette angliache que tchique individu avait découvert qu'la mûsique faisait les pliantes craitre bein pûs vite que d'couotume et chenna m'avait hardi intérrêssi. Il est vrai que quand nou m'avait dit que si y'avait d'la mûsique dans une êtablye quand nou s'mettait à traithe, les vaques donnaient pûs d'lait. J'avais d'mandé a yun des mousses au Bram de v'nin traithe pour mé un matin tandis que je jouais des mélodies sûs man viér accordéon.
Mais après aver joué 'Alouette', 'Vive la Compagnie' et yun ou deux vièrs cantiques Méthodistes, tout ch'que j'en eus fut trais pots mains d'couôtume. J'vins à penser après ch'tait p't'être les cantiques tchi l's avaient découothagies. J'n'éthais pas deu joué l'cantique tchi dit que si nou n'sé convértie pas sûs l'coup, nou-s-est en dangi dé crever d'vant long!
Mais, Moussieu, j'avais dans l'idée que les pliantes pouôrraiént profiter ouèque les vaques avaient print peux et chenna explyique que quand la Merrienne est v'nue m'trouver dans l'clios, ayant entendu l'son d'la mûsique, ou m'a trouvé à jouer m'n accordéon sus l'fôssé d'man bétchet d'raves, J'tais justement bein avanchi sûs `Where is my Wandering boy tonight' quand oulle a gaffé m'n accordéon et m'a chassé dans la tchuisine.
Oulle éthait voulu même le fliantchi sûs l'feu et téléphoner au docteu pour me certifier lunatique, mais j'li ai dit que s'ou faisait chenna j'm'en ithais tout'd'suite à la Mathe au Seigneu, et don, ou s'est trantchillisée et tout a 'té bein. Mais, Moussieu, oulle a dans l'idée d'aller en Djernézi pour tchique jours le préchain mais et dans s'n absence j'pouôrrais m'r'assièthe sûs man fôssé et jouer accordéon à mes raves le long des jours! Si chenna n'les grôssit pas, je n'crethai pûs à chein qu'est dit dans les gâzettes angliaiches, mais j'me fiêthai sûs la 'Post', comme j'ai trejous fait sinon quand j'n'ai pas accordé avec chein qu'j'ai liut dans ses colonnes.
J'vais que l'Sieur Gallienne est sérieux comme candidat pour Député en Ville et tchi dit tch'il est seux d'aver san papi signé. Ch'est tréjous autant, mais i' li faudra pûs d'vouaix s'i veut réussi. Il avait une drôle d'audience à sa réunion, et, accordant à la gâzette, i'n'taient qu'une douzaine en tout, mais i'n'pathait pas dêcouothagi. Heutheusement pour li, p't'être-bein, i n'étha pas à péyi la grôsse somme qu'un candidat en Angliétêrre pour le Parlement est forchi de dêgorgi s'i'n'a pas une cèrtaine proportion des vouaix. J'ai d'mandé à la Merrienne s'ou crait que hardi d'ses couôsins du bord de l'Est le supportéthont, mais ou n'm'a pas raiponnu. San r'gard a 'té assez!
Quant ès Senateurs, la position, par chein que j'peux en vaie, n'a pas changi hardi. Quand, dans l'couothant d'une convèrsâtion, nou mentionne le Député John Le Mèrquand, lé Sieur Krichefski, ou, pour dithe vrai, autchun des candidats, y'a tréjous tchique objection. Yun est trop dépenseux, un autre veur être maitre partout, un traisième n'a pas yeu d'expéthience, un quatrieme nou n'peut pas s'fié d'sûs. Si nou criyait tout ch'que nous entend, i'n'y a pas yun de touos les candidats tchi méthite d'être dans l's Etats. Vraiement, Moussieu, je n'sais pas tchi en craithe, mais chein tchi pathait assez cèrtain ch'est que hardi d'êlecteurs ne prendront pas la peine de dêshaller quand veindra l'jour. Y'étha pûs d'vouaix pour les Députés en Ville.
Ichin a Saint Ou nou-s-entend toutes sortes de rumeurs et la 'Post' a pâsler de deux candidats contre l'Mâjeur dé Gruchy. Yun, ou dit, est une femme bein connue et je n'peux penser qu'a yunne tch'éthait une chance, mais, avec chenna, j'ai d'la peine a craithe qu'les Saint Ouennais voudraient être r'présenté dans l's Etats par un côtillon. La Merrienne dit qu'ou n'se fiche pas mal combein qu'y'en étha pour oppôser l'Màjeur, pour bein qu'oulle aie une chance, après tant d'années d'aller à la Salle Parouaissiale pour mettre sa crouaix sûs un mio d'papi, mais, Moussieu, ou n'voudra pas d'm'dithe tchèsqu'oulle a fait!
Viyiz étout: