Les Pages Jèrriaises

Merriene Disaproves of Dinner

Moussieu l'Editeu,

Avant-hier y m'vint une lettre par le postman et la Merrienne, comme de couôtume, l'ouvrit. Oulle a fait chonna toute sa vie, malgré mes remonstrances car ou dit qu'ch'est san drouait.

'Grand doux, tchèsque ch'est qu'chonnechin?' ou s'fit.

J'print la lettre. Ch'tait une invitation du club des joueurs à la galoche du Portinfé pour lus dîné annuel le neuf du préchain mais. 'Ben seûx qu'che s'sa une bouonne bordée' j'dis a la Merrienne. 'Faut qu'j'aille en ville Sam'di tâchi d'accaté un neu fa. A ch'qui pathait, y'en tout plien dans les boutiques achteu.'

'Sam'di tu s'sas dans tan clios à grapiné tes patates' ou dit. 'J'n'en approuve pas d'chais dîniers, et tu l'sais ben. Tu t'en vas lûs ecrithe pour les r'mércié et tu lûs dithas en même temps que tu n'pouôrras pas y'allé parsque t'n'êtat d'santé n'le permet pas.'

'Ch'n'est pas vrai' je l'y dit. 'Je s'y mus que je n'avais tait pour des mais. Veur-tu que j'lûs diche un mensonge?'

'Un p'tit mensonge ichîn et là n'fait pas grand ma' ou dit. 'mais peux-tu m'dithe, Ph'lip, pourtchi qu'chais gens-là veulent allé dîné à un hotel, quand ils ont tout ch'qu'y lûs faut siez yeux?'

'Ch'n'est pas chonna' je l'y dit. 'Tout ch'qu'y veulent ch'est une bouonne séthée ensembles. Et, après tout, ch'n'est qu'une fais par an.

'Ch'est une fais d'trop' s'fit la Merrienne. 'Man pépée l'y n'allait jamais à chais dîniers. Y faisait san travas, épis dans les huit heuthes du sé, il allumait la chandelle, et ch'tait: 'Ve-t'en, bouonnefemme, il est temps d'ramonté. 'Mais à quatre heuthes du matin y tait à traithe.'

'Et tchèsque ta mémée disait d'chonna?'

'Mémée tait hardi d'même étout. Ch'tait une femme tchi s'méttait ben à san d'vé. Jamais tu n'la viyais a rein-n'faithe, sinon une fais par an ou d'même quand y'avait tchiquechose de nouvé dans l'ber et qu'ou tait forchie d'se r'pôsé un mio. Mais pépée ch'tait du matin jusqu'au séd'd'un but d'l'année à l'autre.'

'Vèthe' j'l'y dit 'et tchèsque en fut l'résultat. A l'âge de chinquante ans y tait criblyié d'roumatices, il avait la goutte et ben souvent il avait ben d'la peine à s't'nin d'but. Toutes les fais qu'nou l'rencontrait il avait ma tchique bord. S'il avait tait à un bouon diné par bordée et s'était permint un mio d'amûsement y n'éthait pas tait d'même.'

'Nou dit que l'travas n'tue pas' j'ajouôtit 'mais ch'est comme tout autre chose; nou peut en faithe trop.'

'Tu-as tréjous print bouon soin d'n'accourchi pas ta vie par chu moyen-là' ou s'fit sêquement. 'Mais quand à chu dîné, tu n'ithas pas.'

'Mais Merrienne-'

'J'te dis qu'tu n'ithas pas et ch'est fini. L'année passée quand tu fut à chu diné à la Grève, ch'fut mé tch'eut à traithe le préchain matin et tu n'fit pas un coup travas chu jour-là.'

'Ch'tait l'podin' je l'y dit. 'Je n'éthais pas deu y touchi.'

'Ben seûx qu ch'tait l'podin' ou dit 'mais j'te dis qu'che s'sait la dernié fais. Si j'tais l'Baillyi je r'fûsé'sais d'donné autchune pérmission pour un dîné.'

'Et il y va l'y-même, sorte d'achocre' j'l'y dit 'et l'Gouverneux étout, sans pâslé des Juges, des Sénateurs, des Connêtablyes et même des Députés. Tu f'thais une bête de té-même, ma vieille. Quand à chu diné-'

'Pour la quatriéme fais, tu n'ithas pas' dit Merrienne.

 

PH'LIP
2/4/1949
 

Viyiz étout:

 

Les Pages Jèrriaises