Les Pages Jèrriaises

Merrienne Dreads The Bomb

And falls out of bed


Moussieu l'Editeu,

La pouôre Merrienne trouve la vie bein duthe chais jours. Pas une semaine se pâsse qu'ou n'vait tchiquechose dans la gâzette tchi l'êffrite et l'empêche de dormi la niet.

Chutte fais chais la bombe que les Russes ont fait. Oulle a liut dans tchique bêtasse de papi tch'ils ont idée d's'en faithe servi pour dêtruithe le monde, et la v'la sûs ses nérfs.

Hier au sé, après avé resté trantchille pour une pôse, ou mint ses lunettes sûs l'aie-du-foyi, se crouaîsit les bras, et m'dit, "Ecoute, Ph'lip, ch'n'est pas tout chonna. Té v'la à fumé ta pipe tout trantchillement comme si rain n'te dêrangeait. A-t'on jamais veu un patheil homme? Je crai véthitablyement que si tu savais que la fin du monde apprèchait, tu n'en s'sais pas pûs gêné qu'chonna."

"Mais tchesque-y t'troublye don ma pouôre vieille? " j'l'y d'mandit. "Laisse-mé en r'pos j't'en prie. Ne v'la bétôt un mais que tu n'm'as pas donné même chinq minutes pour ruminé à man tout-seu. Tchèsque tu'as dans la cabiche chutte fais?"

"Tu sais ben tchèsque y m'troublye," ou dit. "Ch'est chutte bombe. La gâzette Angliaise veur dithe qu'une demié-douzaines des chais âffreuses bombes pouôrraient faithe hardi d'ma. Mets don chutte fichue pipe de côté et dis-mé si ch'est vrai."

"Eh ben, d'pis qu'tu veur savé, j'm'en vais t'explitchi," j'l'y dit, "mais n'me biaume pas si j'te fais peux. Y n'est pas tchestchon d'une demié-douzaine de chais bombes, mais d'yunne seulement. Si par malheur les Russes en lanchaient yunne sûs l'îles, tout dispathaitrait."

"Tchèsque-tu veur dithe - tout dispathaitrait?"

"J'veur dithe que deux minutes après tout ch'qu'est en vie en Jêrri, en Djèrnezi, en Org'ny, en Sercq, en Herme et en Jéthou éthait dispathu dans les fonds perdus. Y n'restesthait rain. Tu voulais savé, eh ben, t'y v'la." Et j'me mint à r'allumé ma pipe.

Pour un bouon quart-d'heuthe la Merrienne ne dit pas un mot. Mais tout d'un coup, la v'la tch'y s'lève et m'flianque une paffe, de tchi qu'ma tête en sonne ocquo.

"Tout chen qu'tu veins de m'dithe ch'est d'la figue de tchan," ou dit. "Tu dév-thais avé honte de raconté d'pathelles mensonges. Mais quand che s'sait vrai, tu sais aussi ben comme mé que l'Comité d'la D'fense prendrait ben vite des m'suthes pour empêchi les Russes d'apprèchi. Nou vêrrait bétôt la Milice par les qu'mins, et j'n'éthais autchune crainte si j'savais qu'la Compagnie d'Saint Ou tait souos l's'armes.

"Epis, quand même," ou continuit, "nou pouôrrait tréjous s'fouôrré souos l'liet ou dans les cottes à couochons pour une heuthe ou d'même."

"Sans doute," j'l'y dit, "et nou pouôrrait étout grimpé dans l'solyi et s'fouôrré souos l'fain ou même souos la maie. La seule chose est qu'nou crev'thait quand-même."

"N'en v'la assez," ou dit. "Si tu veur une aute cliamûse ti n'as qu'a continué, J'te donne en avis de t'taithe."

Et don, Moussieu, je m'tut, mais à trais heuthes â-matin j'ai tait rêvillyi par un frédas têrriblye. Ch'tait la Merrienne sûs l'plianchais. Entendant tchique brit, et criyant que ch'tait la bombe, oulle avait sauté du liet un mio trop vite et s'était êtrav'lée tout san long. Et la djobbe que j'eut à la r'levé jamais ou n'craithaîtes.

Ph'lip

 

Viyiz étout:


 

Les Pages Jèrriaises