À Portinfé,
Saint Ou.
Jeudi au sé.
Moussieu l'Editeu,
J'si bein content d'vos dithe que après deux longs jours dans la câsse à tchan, j'en si éscappé et tout va bein siez nous. Pour chais deux jours la Merrienne né m'avait pas dit un seul mot et j'tais, quâsi au m'sespé, mais hier matin, en déjeunant, i' m'sembliait que si j'disais tchiquechose ou pouôrrait p't'être raipondre. Et don j'eus l'couothage de r'mertchi que l'jour avait 'té assez bé et, ma fé, ou dit que vèthe, pour lé mais d'novembre mais qu'ou n'criyait pas que l'bieau temps s'n allait continué parsque ses rhoumatices li faisaient grand ma. Et Moussieu, de chu moment-là j'avons té comme de couôtume. Il est vrai que j'ai yeu à admettre que j'avais yeu tort, et à prómettre que j'me comportéthais a l'av'nin, mais j'éthais admint autchune chose pour préserver la paix, et après tout, Moussieu, ch'est bête qu'un couplye comme nous tch'avons vêtchu ensemblye tant d'années n'peuvent pas s'accorder pour lé restant d'lûs vie. Et j'peux vos dithe que si la femme de journée que la Merrienne a engagi tâchait de v'nin assièthe sûs mes g'nors ou n'y restéthait pas longtemps. S'ou pouviez la vaie ou comprendraint pourtchi! J'n'ai p't'étre pas tréjous 'té trop pártitchulyi, mais au mains, je m'respecte.
A ch'teu i' lûs faut un nouvieau Député à la Trin'té et l'Chantgni Vautchi s'est déjà decliathé candidat. Si l'Edgar Mouothant avait voulu la djobbe ch'est seux tch'i' n'éthait pas 'té opposé mais sans autchune doute ch'est tchiquechose d'autre tch'il a dans l'idée, et j'n'ai pas besoin d'vos dithe chein qu'ch'est. Quant au Chantgni Vautchi ch'est prèsque certain tch'i' ne s'sa pas êlu sans oppôsition. Nou-s-a dêjà oui que l'Sieur Betchet l'écrivain, n'dithait pas nennin à une deputation. Pâslant d'la Trin'té, y'a des rumeurs que l'John Cabot éthait p't'être idée de résigner à cause de chein tchi fut dit en Cour d'la police de sa pâraisse, mais j'ai d'la peine à craithe chonna.
Une chose tchi troublye la Merrienne hardi ch'est chein qu'nou ouait de chu Marchi Commun mais quand ou me d'mandit hièr au sé tchèsque chonna voulait dithe, j'eus à admettre, Moussieu, que j'n'en savais pas grand'chose et ch'est vrai assez, mais j'n'ai pas ôsé dithe à ma bouonnefemme que j'n'en comprenais rein du tout, car un homme est tréjous supposé d'en saver pûs long que sa femme.
"Eh, bein, Merrienne" j'li dis "Par chein qu'nou-s-entend, si l'Angliétêrre est prête à joindre j'sommes fórchis de dithe, comme dans les vièrs temps certains des Jurés-Justiciers disaient "même opinion", ch'est à dithe qu'i n'avaient pas d'opinion yeux memes".
"Chonna est tout bein bon," ou dit, "mais dis-mé, Ph'lip, si chonna voudrais dithe qu'nou pouôrrait accater tout a miyeu marchi si ch'est d'même j'si absolument en faveur.
"J'voudrais dithe oui, ma vielle," j'li dis, "mais j'crains que-ches'sait l'contraithe. Nou paiethait pûs et pas mains. Dans p'tit d'temps nou vêrrait tout hauchi. Tu paiethais pûs pour tes cauches, tes souliers, et tout l'restant et mé pour man p'tun et man vêrre de biéthe".
"En es-tu seux?" ou d'mandit, "Oui", j'li dis, "j'en si seux" "Eh bein," ou s'fit, 'i' n'y a qu'une chose à faithe. Ch'est d'aller tous en Ville et dithe à nos Etats que s'ils ôsent supporter pathelle chose nou l's enviêtha tous à la porte. Nou n'a pas r'oublié la bordée qu'les femmes d'la pâraisse de Saint Jean entritent dans la Cour Royale avec des chouques, et cachitent les Juges et l's Officiers d'la Couronne dehors. Chonna pouôrrait se r'faithe".
J'eus à dithe, Moussieu. "Dans chais temps-là, Merrienne", j'li dis, "les Jurés et tout l'restant 'taient un tas d'fripons tchi 'taient à s'renrichi en volant l'publyic, mais nou n'voudrait pas en dithe autant des mêssieux tchi nou gouvernent au jour d'agniet. Les temps sont changis, bouonnefemme, et les bouonnes vielles couotumes ne r'veindront pas".
Et Moussieu, i' n'nos reste qu'une source de satisfaction, et ch'est d'aver vêtchu dans chais bouons vièrs temps quand les fermiers s'entr'aidgaient et quand, si un citoyen r'venait siez-li après un diné d'police ou une Assembliée d'Pâraisse, trop lâssé pour trouver san liet sans assistance, y'avait tréjous tchique vaisin à li aidgi à ramonter les d'grés, et à le deshabillyi. Mé, tchi vos pâsle, j'ai veu chonna s'faithe, et l'préchain jour tout ch'qui restait ch'tait un têrriblye mal-à-la-tête et une resolution de joindre l'Armée du Salut et signer la tempérance, une resolution tchi fut bein vite abandonée jusqu'á la préchaine bordée.
A ch'teu que la grande êcole dans l'Mont d'Saint Sauveux a 'té ouverte officiellement, nou-s-entend que l'John Lé Mèrquand a dans l'idée une autre grande êcole tchique bord dans l'ouest. J'n si pas seux si ch'est vrai, mais entre nous, Moussieu, je n'si pas en faveur de trop d'êducation, et j'm'en vais vos en donner un exemplye. Quand j'tais p'tit mousse j'avais un onclye tch'avait trais fils. I' 'tait raide pour l'êducation, et i' les gardit à l'êcole pour les années. Quand vint un temps le grand s'mint à fermer, fit banq'route et fichit san camp en Australie. La seule nouvelle que nou-s-en eut pûs tard ch'tait tch'i' 'tait en prison pour vol et qu'i' n'en sortithait pas pour un autre djais ans. Le s'cond mathyit une fille tch'avait des sous, mais p'tit après ou vint à découvri tch'i' tait dêjà mathié. Il en eut pour chinq ans. Lé traisième fut trouvé un bieau jour admithant les bieautés d'la natuthe dans un clios avec une hardelle d'une reputation que nou n'tchèstchionne pas. Ch'tait san dernié galant tchi les trouvit ensemblye et, étant un fort balloque, i' donnit une latteuse au couplye, et, par conséquence, en attrapit pour un mais en cage par l'Juge Vaudin. A ch'teu Moussieu ou pouves vaie, pourtchi que je n'si pas en faveur de trop d'êducation. A bétót.
Ph'lip
Viyiz étout: