Moussieu l'Editeu,

Eh bein, s'fit la Merrienne, l'autre sé, y pathait qu'nos Etats on fait banq'route. Je n's'y pas surprinse, car je m'y attendais y'a longtemps qu'j'ai dit tch'y n'pouvaient pas continué longtemps comme ils allaient sans s'trouvé souos l'fou. Avec chonna, ch'est une disgrace!

Allons, Merrienne, j'l'y dit, y n'faut pas s'exité. Il est vrai qu'nos Etats ont tait dêpenseurs chais années, et n'ont pas t'nin d'compte du vier diton tchi dit que dans l'êffat d'moyen, un sou sauvé est un sou gâgni, mais, avec chonna, y n'faut pas craithe que l's'Etats sont sûs l'point d'avé à réuni lûs créanciers. La pôsition n'est pas si pièthe comme tout chonna. A ma veue notre Baillyi a sauvé la situâtion, et l's'Etats savent ach'teu que n'y'a qu'une chose à faithe. Nous admet tch'il tait grand temps qu'les Comités fûssent am'nès a r'connaitre que les immenses sommes tchy dépensent n'sont pas lûs sous, mais les sous du publyic. Si ch'tait lûs sous, che s'sait difféthent.

Tu peux l'dithe, oulle accordit, mais, pâslant du Baillyi, pourtchi n'avé pas dgérni les Comités y'a longtemps? Absolûment, y pouvait vais que l's'affaithes allaient mal.

Vèthe, sûs un sens, j'l'y dit, mais n'oublie pas que dans la Chambre le Baillyi est là tout simpliyement comme Président. Jusque ichin il avait tréjous laissi les Comités faithe comme y voulaient, mais à la fin il est v'nu à vais tch'il tait temps d'lûs dithe que l'heuthe tait v'nue pour crié halte. Autrement, ch'tait une affaithe fichue.

Mais, ou dit, j'criyais que ch'tait la djobbe du Comité des Finances. Ch'est chen qu'j'avais tréjous comprint.

Quant à chonna, j'l'y dit, y'a tchiques années, quand l'Juge Billot, un bouon Jêrriais, Président du Comités des Finances dans l'temps, eut l'couothage de crititchi tchique demande d'un certain Comité, nou l'y dit que l'Comité n'tait pas là pour crititchi, mais pour trouvé les sous. J'ai tréjous creu que ch'tait pour chonna tch'y résignit.

Ah! ou dit, je n'savais pas chonna, mais j'ad'mithe le Juge Billot. Comme tu dis, ch'est un bouon Jêrriais, et chen qu'nou r'grétte chais que j'n'avons pas dans l's'Etats pûs d'hommes de sa trempe. Mais, crai-tu vraiement qu'la Chambre prendra l'avis du Baillyi, et qu'à l'av'nin les Comités se comportethont comme-y-faut?

Oui, Merrienne, j'l'y raiponnit. N'y'a pas d'doute que les membres d'la Chambre ont yeu une rude leçon, et qu'si tout va bein, dans un an ou deux, n'y'étha pas d'tchéstchon d'nos taxé pûs qu'nou n'fait agniet. Mais chen tchi m'gêne pûs qu'toute autre chose ch'est l'Comité d'la Santé Publique. Les v'là à faithe d's'ênormes creux dans les routes en ville, et y pathait qu'chais travaux-là ne s'sont pas finis pour au mains vingt ans, et que l'couôtage, si n'ya pas tchiquechose de fait s'sa assez pour ruiné l'île. Ch'n'est pas par le mille tch'y veulent des louis, ches par le million. Pourtant j'n'ai pas ouï d'autchune épidémie, et y m'semblye que les gens, à prendre yun dans l'autre, vivent aussi viers comme lûs anchêtres. A ma veue, ch'est une vraie folie.

P't'être bein, ou dit, mais l's'Etats n'ont personne que yeux-mêmes à biaumé. Peux-tu m'dithe pourtchi tch'y s'accordites à chutte bêtise-là?

Nou lûs contit tout-d'sortes de sornéttes, j'l'y dit, et y votitent pour sans savé tchèsque-y faisaient. Au jour d'agniet y vaient bein tch'il éthaient deu donné un mio pûs d'considéthâtion à l'affaithe, mais ach'teu il est p't'être trop tard.

Et p't'être bein qu'nouffé, ou dit. Après tout, bein souvent, quand nous a fait une bêtise nou peut la r'pathé. Y n'est pas trop tard.

Faut l'éspéthé, j'l'y dit.

Ph'lip
1952
 

Viyiz étout: