À Portinfé, Saint Ou.
Moussieu l'Editeu,
Ch'est avec grand depié que j'vos annonce que j'si en disgrâce. La Merrienne m'a mint dans chein qu'les Angliais appelent la câsse à tchan, et ou dit que j'm'en vais y rester jusqu'au jour de l'êlection pour Sénateurs.
J'm'en vais vos explitchi chonna dans tchiques, minutes, mais dans l'entretemps i' faut que j'vos diche un mot ou deux au sujet des "shows" que j'ai veu d'pis ma dernié lettre. A Saint Brélade, le "Bill" Quénault remportit prèsque tout, et j'vis, p't'être pour la dernié fais, sa célèbre vielle vaque, la "Rosebay". Oulle étha douze ans le djix du mais d'Févri, et y faudra bèthe un p'tit lermin à sa santé chu jour-là. A notre "show" des Trais Pâraisses, dans un grand clios à Sainte Mathie, i' y'avait une forte entrée dans châque pâraisse, et i' 'tait tard quand les Juges finitent la dernié clâsse. Y'avait d'tchi bouon partout, et l'Fraînque Avri remportit l'championnat avec une raide jeune vaque. Lé George Rom'thi dé Sainte Mathie en avait une bouonne étout, et, pour dithe vrai je s'sais content d'les r'vaie au "show" d'Ile, la s'maine tchi veint, pour être seux tchèsqu'est la miyeuthe des deux. Lé John Lé Ruez, de Saint Pièrre en montrit yunne étout tchi m'éthait pliut ocquo pûs qu'ou n'fit s'ou n'avait pas yeu un mio dé Djernésiais dans sa cabiche. Dans les viaux d'un an, Fraînque Avri en deshallit quatre que je n'crais pas qu'nou trouv'thait dans autchune autre êtablye en Jèrri. Au "show" dé Saint Sauveux, Grouville et Saint Cliément, lé "Ken" Richardson, couôsîn à la Merrienne, à chein qu'ou dit, fit l'championnat, et l'rêserve avec deux g'niches r'nouv'llées, une chose que nou n'avait jamais veu. Il avait une charmante jeunne vaque étout, et nous peut vais à ch'teu tch'i n'est pas v'nu s'êtablyi à Saint Sauveux pour rein.
A ch'teu ou voudrez saver tchesqu'i s'arrivit pour faithe tant marri la bouonnefemme que j'm'en vais couochi sûs l'sofa, ou même souos la tcherquéthie pour pûs d'un mais. Ch'tait Mardi la niet que dans les quatre heuthes du matîn, ou m'rêvillyit avec un co-d'pid dans l'êpine du dos tchi fut bein près d'mé mettre sûs l'plianchais. Je d'scendis au pûs vite.
"N'en v'là assez," ou s'fit d'une vouaix qu'nou-s éthait entendu un mille au lien. "Fiche-mé l'camp hors d'ichîn, et dêliêmment. Né v'la pûs d'une heuthe que je n'peux pas dormi dé tchi qu'j'en ai presque perdu la tête. Je n'sais pas tchèsqu'i' t'ont donné a bèthe au "show," mais tu veins d'nos chanter un tas d'gniolin au sujet de l'êlection pour Sénateurs, mêlé avec des vaques et des g'niches r'nouv'llées, que tu as veu ès "shows".
"Mais, Merrienne", j'li dis, tâchant d'mé ravigotter, "tu sais bein que j'dormais et que je n'savais pas chein que j'disais, et, après tout dans les circonstances tu n'dév'thais pas m'bliaumer. J'ai ouï dithe que ta couôsine Souky, quand ou 'tait jeune fille, sortait d'sa liet et allait s'promner parmi les chambres, sans saver tchesqu'ou faisait".
"Vèthe", ou dit. "mais ou fit une mêprînse une niet et s'trouvit ouèsque ou n'avait qu'faithe. Ou n'tait pas si innocente comme nou criyait la Souky. A ch'teu, quant à té tu'as qu'menchi par gagi sûs les candidats. Ch'tait comme chennechin. Yun contre yun, Krichéfski: deux contre yun. Crill: yun contre deux. Maillard et Perchard: six contre quatre. Norman: chînquante contre yun. Farley: yun contre douze, Lé Mèrquand, et Cronshaw j'ai r'oublie. Y'avait, étout, des prix pour les vaques au Sieur Vibert, à Jack Rondé et à Fraînque Avri et pour les g'niches r'nouv'llées au Sieur Richardson. Ch'tait un vrai mélange. Allons va-t'en que j'aie un mio de r'pos et n'oublie pas que si tu r'quémenche j'enviethai pour le docteu, et pûs qu probablye tu t'trouv'thas à l'Asile."
Je n'peux pas craithe, Moussieu que chonna continuetha pûs qu'un jour ou deux, car ma bouonnefemme est d'bouon tchoeu, mais j'peux vos dithe à ch'teu chein que j'crais des chances des candidats qu'ont té annoncés dans la "Post," ou, au mains, j'dév'thais pouver en appréchi un mio pûs près que la s'maine pâssée.
La Gâzette a donné les noms dé huit mêssieux tchi sont seux d'aller ès vouaix, mais i' y'a ocquo yunne ou deux choses à considéther. A qu'menchi nou n'peut pas être seux que la liste est compliete, car y'a ocquo tchiques semaines d'vant la nominâtion, et pis lé "J. J." n'a pas ocquo dit s'il a idée d'prendre ou non. J'avais dit la s'maine passée tch'i' 'tait inprédictablye et j'n'ai pas changi d'opinion sûs chu point-là, mais quand-même j'ai bein d'la peine à craithe tch'i' s'mettra sûs les rangs, et je n'sis pas absolûment certain tch'i' réussithais s'i' disait oui. Avec chonna i' faut admettre que y'en a tchi craient tch'i' veindrait preunmyi, et la Merrienne est d'avec yeux. I s'peut tch'ils ont raison je n'sais pas.
Quant ès autres, je qu'menche à craithe que d'vant long nou dev'thait pouver chouaisi les quatre preunmiers, sans être trop hors d'la vaie, n'oubliant pas en même temps, que nou pouôrrait être hardi mêprînt et que la Ville est comme lé "J. J." inpredictablye. Dans la Campagne i' n'y'a pas d'doute que l'Hedley Maillard et l'Bill Perchard éthont tout-plien d'support, pour bein que l's'êlecteurs ne restent pas siez-yeux. Ch'est à chais deux candidats de s'mettre en travas aussi vite qué possiblye car y'a d's électeurs ocquo tchi n'pathaissent pas pûs interessis qu'chonna . J'en trouvis yun à Saint Louothains tchi 'tait prêt, à voter si n'avais pas à rester siez-li pour aidgi à sa missis à faithe san lavage: un autre ichîn à Saint Ou tch'ithait jusqu'à la Salle Parouaîssiale si l'temps 'tait bé, et ocquo un autre à Saint Mathie tchi n'manq'thait pas si sa bouonne vaque avait vêlé.
Comme chonna, Moussieu, ou vêrrez que la situâtion est ocquo complitchie, et qu'nou n'peut pas ocquo s'faithe trop seux d'autchune chose. Si j'pouvais oublier la fichue êlection jusqu'au douze du préchain mais i' n'y'éthait pas un homme en Jêrri pûs content qué mé, mais chonna n'étant pas pôssiblye j'm'en vais têchi de dêcouvrir, en allant ichin et là dans la pâraisse, si l'Mâjeur d'Gruchy pouôrra trouver assez d'vouaix pour garder sa djobbe de Député quand veindra l'mais d'Decembre. Je l'vis au "show" vendrédi et je n'trouvis pas tch'il avait trop bouonne mine et j'éthais voulu li adressi tchiques patholes, mais après aver dit que l'temps n'tait pas caud et que l'clios 'tait trempé, i' m'touônit l'dos et s'en fut, comme un homme bein gêné. Et quand j'appréchis une groupe dé Saint Ouënnais pour les tchèschionner, j'n'eut autchune satisfaction car i' pathaissaient pûs intérêssis dans les bêtes et les Sénateurs que dans les candidats pour Député à Saint Ou.
PH'LIP
15/10/1960
Viyiz étout: