Ph'lip and a remedy
Moussieu l'Editeu
J'avais espéthé d'allé au show des trais pâraisses l'aut' jour, mais la Merrienne tait d'une humeur de tchan quand je d'vallit pour déjeuner et quand j'ly dis dé m'ramâssé ma bianche quéminse et ma bianche d'jène, ou s'mint dans une telle colèthe que j'fichit man camp hors de la tchuisine à tic de corps.
Et don j'n'y fut pon. Et j'en avais grand r'gret, car ès shows nou trouve tréjous d's'amins prêts à vos convié épis quant à mé j'aime à vais si une vaque à un bouon piéchot et si ses p'tites hanques sont comme y faut. Etout dans les bouêux j'en aime yun qu'a du bathi, un bouon l'avant et tch'est bon plianté sus les gambes de drièthe.
Y'a ben d's'années, quand j'tais du Louothi, nou m'propôsit pour juge à la réunion annuelle, mais y'en eut yun d'la Rose tch'y mint objection, disant que j'n'avais jamais montré, et qu'je n'connaissais pas la difféthence entre une vaque et une biche. Et j'perdit par une vouaix.
Ch'tait un menteux : J'ai gardé des vaques et des biches, même un bichot, et j'peu les dithe yun d'lautre. Et si j'n'est pas montré ch'est parceque nou m'a tréjous dit qu'un gâs comme mé, tchy n'a ni sous ni influence, peut gardé ses bêtes siez-l'y. Etes-ous de ch't'avis-la ? (L'Editeur : "Ch'est du gniolin !'')
* * * * *
Il en yint yun siez nou l'sé du show tchy s'plaignait tch'il avait tait volé. A l'ouï il avait la plus belle géniche du show. N'y'en avait pas yunne à l'y v'nin au g'nou. Quant à la sienne qu'avait yeu l'rouoge riban ou n'valait pas chinq louis pour le bouochi.
"Oulle à l'mûse d'travers,'' comme y s'faisait, "et la coûe étout. Oulle a une tête de brébis et un dos d'chameau. Et sinon qu'y'a tchique signe de trâns, nou dithait qu'ou n'a pas d'piéchot. Une vrai bricole, man Ph'lip.''
Je n'y étais pas, et par s'n'appathence et san d'vis je crai quasi qu'man vier amin avait bu deux d'goûts d'tchiquechose pus forts que la limounade. Mais j'ai tréjous r'mertchi qu'un homme qu'a fait l'preumié prix pâsle de bouons juges de bêtes, tandis qu'un perdant vos dit ch'tait des bêtes de juges.
Y'en avait yun une bordée tchy vint m'dithe tch'il avait tait volé. J'l'écoutit pour une demi'heuthe, épis j'l'y dit ben trantchillement : "Ecoute, man vieux. Toutes les fais qu'tu t'est trouvé au haut d'la classe, ch'tait d'bouons juges. Mais quand tu perd, tu'as tait volé. Je ne comprends pas chonna.''
Y s'en fût tout mârri, mais ch'tait vrai. Et y'en a tout plien d'autres comme l'y. Quand a mé j'ai tréjous aimé un bouon perdant.
* * * * *
Pâslant d'autre chose. Connaissous par chance un r'miède pour le mauvais ma dans les reins qu'nous appelle le lumbago ? Ch'n'est pas pour mé, mais pour la Merrienne. Ne v'la tchique temps qu'oulle en souffre, et ou m'mène une vie si duthe que si chonna continue je s'sait forchi d'applitchi pour une divorce.
Le long des jours ou gronne et gronne, et de niet ch'est ocquo pièthe, car ou n'peut pas dormi, et quatre ou chinq fais y faut qu'je m'léve pour l'y frotté l'dos, ou pour la poussoté.
Epis ch'est : "Pas si du don Ph'lip !'' ou "Che'nest pas là la piéche.'' ou "Pas d'même; tu n'est pas à êcredé une vaque !'' Et mé tchy fais d'man mûs d'allé douochement pour n'ly faithe pas d'ma. Seux et certain qu'j'ai n'pouorrai pas enduthé chonna longtemps.
* * * * *
Une bouonnefemme de par ichin m'a r'quémandé un r'miède, et je crai que j'm'en vais l'êprouvé. A qu'menchi, y faut une bouonne douzaine de colimachons, épis une tchilieuvre, une ouothelle de lapin, la créte d'une néthe poule, et un vier crapaud. Nou met tout chonna dans le sorsepan, avec un moi d'chnichon et d'la suthelle,et nou l'bouord pour quatre heuthes, rêmuant l'mélange tout l'temps.
T'chèstque ous en pensez, d'chu r'miède'la ? Pour de mé, j'n'y crai pas pus qu'chonna. A qu'menchi j'n'aime pas l'idée d'être plianté en d'vant du feu pour quatre heuthes de temps. Epis iou allé ramâssé une tchilieuvre ? J'ai d'mandé à la vieille si un bouon long ver de terre ne f'thait pas aussi ben, mais ou dit qu'nânin. Ch'est fichant.
Y'a chonnechin étout. Si la Merriene se trouvait enpouésonnée et qu'y'avait une levée d'corps, ne s'saient-y pon capablyes de m'trouvé coupablye de meurtre ? Entre nous, Moussieu, j'ai idée d'mouothi dans man liet, et pas au but d'une corde.
PH'LIP
Morning News 12/10/1946
Viyiz étout: