Au Portinfé,Vendrédi matin.
Moussieu l'Editeu,
Ch'est d'tchi bein triste siez nous chais jours. Tout est si mouoillyi que même dans la tchuîsine, ouèsque y'a un bouon feu d'bouais, y'a d'la mucreu même dans la cage du canârien, tchi s'en pliaint le long des jours.
Y'a deux pouces d'l'iau dans l'êtablye ès bêtes et même pûs dans la stâlle au bidet. Chonna pouôrrait l'y faithe du bein, car y souffre dans ses gambes, mais si ch'est des rhoumatices, y pouôrrait s'n'allé d'un jour à l'autre. Les seuls habitants d'la férme tchi n'pathaissent pas gênés ch'est notre vier canard et des deux femmes, tchi s'amusent à nagi dans l'bel du matin jusqu'au sé.
Quand j'fûmes nos couochi Mercredi au sé, la Merrienne print san parapluie, car y d'valait des gouttes d'iau du pliafond sûs l'liet, mais ayant souffert hardi jusqu'au matin, j'décidit d'êprouvé tchiquechose d'autre, et hier arlevée j'êtendit l'tarpaulin sûs les couvèrtuthes et j'pûmes dormi assez en paix. Y'avait une p'tite mathe d'iau dans l'mitan, mais le lier 'tait séc, et ch'tait chonna tchi fallait.
Ach'teu, Moussieu, hier au sé, la Merrienne comme de couôtume, se mint à pâslé d's'Etats, et ayant liut le long rapport au sujet des égouts ou me d'mandit si ch'est vrai chein qu'le Député Farley avait dit entouôre la Baie d'Saint-Brélade. "Y pathait," oulle ajouôtit, "qu'la baie est si plienne de salop'thie, qu'autchune pérsonne tch'y va risque d'être empouaissonée. Pourtant j'y'ai 'tait bein des fais, mé, et j'n'ai jamais veu ditét."
"Ni mé ni-ntout," j'l'y dit. J'y fut d'exprès dans le S'tembre et j'parcouothit la baie d'un but à l'autre, et comme tu peux l'vais je s'y ocquo en vie. Je n'dis pas qu'la baie était tout-à-fait nette, car y'a tréjous tait une salle cârre end'sous d'églyîse, mais y'avait des vrégies et des vrégies d'biau sablion, comme y'a tréjous yeu. I'm semblye que l'Député Farley exagère hardi pour tâchi d'avé sa tête. Avec chonna y n'y'a pas de doute qu'un êgout tout le long d'la baie s'sait asséz d'sithablye."
"Mais," ou dit, "une fais que l'travâs s'sa fait, ouèsque toutes les sales iaux s'en ithont?"
"A Bellozanne," j'l'y dit.
"Oh!" ou s'fit, "et sans doute chonna dissip'tha la mauvaise odeu de tchi que l'monde dans chu district-là se plaignent dépis longtemps."
"Ah, mais Merrienne," j'l'y dit, "n'oublie pas que l'Député Farley a promint à un Ministre, ch'est-à-dithe lé Député Rider, que bétôt n'y'étha pas d'odeu du tout."
"J'n'oublie rain," ou dit séquement, "mais y' longtemps tch'y y'a promint chonna, et pourtant l'odeu est ocquo là. Que l'Député Farley aille d'meuthé dans la vallée d'Bellozanne, et j'éthais pûs d'fouai dans ses promêsses. Ach'teu, Ph'lip, y'a une autre chose. As-tu veu qu'en Ville quand des vieilles gens d'mandent de l'aide, ils ont a signé un papi donnant à la pâraisse le drouait d'rêcouvri tchein qu'ou lûs avait donné si par chance ou découvre tch'ils avaient ocquo tchiques sous d'restant au jour de lûs mort?"
"Oui," j'l'y dit, "j'ai liut chonna, et à man point d'veue ch'est une disgrâce. Jamais j'n'éthais creu qu'la Pâraisse de Saint-Hélier éthait d's'cendu si bas. S'oulle est à court de sous, y'a d'autres manièthes de la trouvé. Seux et cértain tchi n'faudrait pas v'nin nos pâslé d'même ichîn à Saint-Ou. Je n'sommes pas riches, mais au mains j'nos réspectons. Ach'teu, bouonnefemme, si j'allions nos couochi?"
Ou fit une grimache. "Y n'y'a pas d'feu dans la chambre, Ph'lip, et l'iau d'goutte ocquo du pliafond."
"J'sais bein," j'l'y dit, "mais j'avons notre tarpaulin, et yun d'chais jours y nos r'veindra du sec."
Ph'lip
8/1/1958
Viyiz étout: