Les Pages Jèrriaises

La Célébrâtion

Un jour pour les auberges

Moussieu l'Editeu,

Ch'est Mêcrédi au sé et mé et la Merrienne, j'sommes assis dans nos grand'tchaises nos d'mandant pourtchi qu'le jour avait tait un holiday.

"A qu'menchi," ou dit, "le jour de la libéthation 'tait un Mardi et pas un Mêcredi. T'en r'souveins-tu, Ph'lip?"

"Oui, ma vieille," j'l'y dit, "car ch't'arlevée-là ch'tais dans l'clios d'driéthe à digoté avec une frouque quand j'entendit la clioche de l'eglyise qu'menchi à sonné. J'comprint tout-d'suite que ch'tait l'grand moment, j'fliantchit la frouque par-dessus l'fôssé, et j'entrit dans la tchuîsine ouèsque tu tais à plieuthé."

"Ch'tait d'jouaie, man Ph'lip," ou dit, "ch'tait d'jouaie, et j's'y bein seuze que tu'avais les lérmes ès iers étout."

"Vèthe," j'l'y dit, "at j'n'en avais pas d'honte. Mais ach'teu, Merrienne, y'a onze ans d'chonna, et nous a veu bein des changements dans notre p'tit Jêrri. Quant à la célébration du grand jour, nos Etats, jusqu'à l'année pâssée avaient organîsé une procéssion et un service dans la matinée, mais agniet tout ch'que y'avait ch'tait une manièthe de fête à la Preumié Tour épis du football à Springfield. Pour dithe vrai ch'tait un jour pour les aubérges."

La Merrienne dit qu'ou craignait hardi que ch'tait vrai.

"Bein seux qu'ch'est vrai," j'l'y dit, "et sûs un sens nou peut comprendre. La classe ouvrièthe n'avait rain à faithe et n'y'avait rain à vais. Pas êtonnant que d'bouanne heuthe à-matin la piûpart de nos travailleurs avaient sé, et que l's'aubérges ont tait pliennes ou prèsque pliennes tout l'jour."

"Tu peux dithe étout," ou s'fit, "que y'avait hardi d'bourses viédes, et hardi d'ouvriers tch'y n'se trouv'thont pas trop bein d'main-au-matin. A m'n'idée la miyeu chose à faithe che s'sais d'abandonné chutte célébration tout-à-fait. N'oublie pas, Ph'lip que y'avait hardi d'monde le jour de la libéthâtion tch'y taient bein tristes. Mais enfin, y faut oublié tout chonna pour le moment et pâslé d'autre chose."

"Vèthe," j'l'y dit, "j'pouvons pâslé des shows et d'chein qu'j'ai veu là d'pis que jécrit ma dernié lettre. Au show des Trais Pâraisses, y'avait - "

La Merrienne intérrompit "Je n's'y pas intérêssie d'savé tchèsque tu'as veu ès shows," ou s'fit. "J'en ai yeu plien l'dos d'chonna pour bétôt tchinze jours et j'n'en veur pas d'autre agniet. Après l'grand show d'la Ville, p't'être-bein mais pas ach'teu. Tu'as tait dans prèsque toutes les pâraisses dernièthement, et tu'as veu des patates partout. Tchèsque tu'en crais?"

"Eh bein, Merrienne," j'l'y dit, "dans une djaizaine de jours les patates en ont fait hardi. Jamais j'n'éthais creu tchi se s'saient r'faites si vite. Il est vrai que dans l'têrrain y'a ocquo des chentaines de vrégies tchi n'sont pas trop belles, mais même les pûs faillies sont comme la vieille poule à Marguérite, tchi tait sûs l'point dé crevé un jour, mais tchi produit un oeu l'préchain jour et tchi vêtchu pour bétôt une vingtaine d'années. Y'a des signes de vie même dans les bétchets qu'avaient tait râsés, et j'm'attends qu'à la fin la vieille Royale cabot'ta comme de couôtume."

"J'ai tait vais la bordeuse à-matin," ou dit, "et i' m'semblye que nou pouôrrait p't'être avé un fricot d'nouvelles patates dans tchiques jours. Y'a des vignes ouèsque la terre voudrait qu'menchi à cratchi."

"Nouffé, nouffé, Merrienne," j'l'y dit. "Crais-tu que j'm'en vais mangi des patates que j'pouôrrais vendre pour pûs d'un ch'lin la livre? Je n'pouôrrais pas en avalé un morcé. Y faut attendre ocquo un bouon tchinze jours. Mais la bordeuse pathait bein quand-même, mûs qu'la caboche, ma chièthe."

"Ch'est les fichues carpilleuses," ou dit, sans pâslé des limaches et des colimachons. Y m'semblye que tout ch'qui y'a d'chais péstes-là dans la pâraisse de Saint-Ou s'trouvent parmi mes caboches. Tant pûs j'en dêtruise tant pûs y'en a. Ch'est une vraie mînsèthe."

"N'y'a pas d'soin, Merrienne," j'l'y dit, "si les patates paient, nou n'se gène'na pas des caboches."

Ph'lip
12/5/1956
 

Viyiz étout:

 

Les Pages Jèrriaises