Moussieu l'Editeu,
En b'vant l'tais lundi au sé, je r'mertchit qu'y'avait toute appathence de biau temps pour le show des trais pâraisses. "J'ai oui," j'dis à la Merrienne que y'a tchiques bouons boeux à Saint-Pierre, mais faut être là pour les vais."
La bouonnefemme mordit sûs une galétte. "Et j'pense ben," ou dit "que d'main, comme de couôtume, tu me d'mand'das, après dêjeuné, pour ta bianche quémînse et ta djêne, pour t'en allé prendre tan temps à chu show."
"Nouffé," j'l'y dit, "che s'sa après dîné, car ch't'année ch'est dans l'arlevée. N'oublie pas d'biétchiné mes bottes et d'bringi ma câsaque, et d'prépathé l'dîné pour douze heuthes."
"Et y'a-t'y tchique autre chose que tu m'voudrais vais faithe?" ou d'mandit. "Tu n'as qu'à d'mandé tu sais ben. Tu n'éthais pas par chance besoin d'un pathe de gants et d'un mouochet en souaie? et, tandis qu'j'ys'y, j'pouôrrais aussi ben téléphoné pour un môteur. Un grand moussieu comme té n'peut pas allé à pid."
Ach'teu, Moussieu, quand la Merrienne se met à pâslé d'même faut s'en méfié, car ben seux qu'y'a tchiquechose tchi l'y pique au néz. Et y faut savé comment la prendre. Ch'est tout à la douoche ou nou n'en f'tha rain.
"Je n's'y pas si bête comme chonna," j'l'y dit, "mais l'travâs n'prêsse pas, et tu sais ben qu'j'ai tréjous aimé les bêtes. J'n'ai s'sait pas longtemps hors, et asêsé j'pouorrai t'dithe tchèsque a yeu les prix et les bêtise que les juges on fait."
La Merrienne châtchit la tête. "Tout chonna est ben bouon," ou dit, "mais à m'n'idée un homme tch'y n'a pas d'boeux à montré dév'thait resté siez-l'y."
"A chu compte-là," j'l'y dit, "n'y'éthait pas gand monde. Mais arrête jusqu'au mais d'Octobre. J'lûs en montréthai yun mé, un boeu comme y n'ont ocquo jamais veu."
"Est-che ch't'emânue-là d'sept mais tch'est dans l'êtablye?" ou d'mandit.
"Ben seûx, qu'ch'est l'y."
Ou hautchit l's'êpaules. "Si tu-avais prînt m'n'avis," ou dit, "y'a longtemps que l'bouochi l'éthait yeu, la quédolle. Il a l'nez d'travers, la coue crotchie et un dos comme un chameau. Ch'est une disgrâce à l'êtablye."
"Il amend'da en craîssant," j'l'y dit, "et n'oublie pas qu'sa grand'mèthe fut ben près de v'nin quatrième dans sa clâsse une année au show des trais pâraisses. Mais quand y n'veindrait pas dans les prix, y'étha tréjous tchique Améthitchain ou tchique Angliais pour l'accaté."
"Bâille-l'y un coup d'maillot," ou dit. "Tu'en s'sa tchitte de chutte manièthe-là, et che s'a yun d'mains à soigni. Il est si laid qu'j'en rêve de niet. J'avons gardé des bêtes toute notre vie, et jamais j'n'avais ocquo veu un patheil objét."
"Châtchun s'pliait," j'l'y dit. "Mais enfin, j'espèthe que tu f'thas comme j't'ai d'mandé pour demain. J'ai grande envie d'vais si Saint-Ou peut montré tchiquechose pour battre les autres pâraisses."
"Quand à chonna," ou s'fit, "tu peux t'en faithe seux sans y'allé. Reste ichin, et tu vérras les r'sultats sûs la gâzette."
Et don, Moussieu l'Editeu, j'n'y fut pas mais la Merrienne avait raison, car ch'fut Saint-Ou tchi fit l'championnat."
Ph'lip
1949
Viyiz étout: