Les Pages Jèrriaises

Ph'lip va à Saint Piêrre



à Portinfé, Saint Ou.
Vendredi au sé.

Moussieu l'Editeu,

Eh bein. y'a yeu pûs d'une surprinse dans les élections pour Députés mêcredi pâssé, et le r'sultat en est que j'avons douze nouvieaux membres des Etats, treize si nou compte le Sénateur Rom'thi.

Mêcredi, j'fus transporté par la charmante dame tchi m'a aidgi dêjà tant d'fais à aller ichin et là et j'fumes preunmièthement à Saint Piêrre pour vaie par combein d'vouaix que l'Sieur Egré s'en allait gâgni, mais, comme ou savez à ch'teu', i' fut battu par une grande mâjorité. J'ai dit bein des fais que Saint Piêrre est une drôle de pàraisse, et ou y'a tréjous 'té. Y'en a parmi les vieillards pûs d'yun tchi dit que ch'est à cause d'une vielle chorcièthe tchi 'tait mârrie parsque l'Comité d'Taxâtion l'avait hauchie de djais quartiers parsqu'oulle avait 'té minse en prison pour aver battu s'n homme avec un manche de bringe, mais i' d'meuthait au Coin Vathin, et les natifs d'chu district-là ont la tête si duthe qu'un manche de bringe romp'thait en deux sans faithe autchun ma à la tête.

Quant à mé j'crais que la pâraisse a 'té dominée si longtemps par la famille Egré, qu'ou criyait tch'i' 'tait temps d'aver un change, mais quand j'nos trouvimes là, personne n'pouvait nos dithe pour seux tchèsqu'i' s'en allait y v'nîn. Certainement, les supporteurs du Sieur Thomas éthaient 'té contents d'une mâjorité d'une doûzaine ou d'même. Entre nous, Moussieu, j'ai dans l'idée que l'ex-Député Simon avait tchiquechose à faithe avec chutte victouaithe mémorablye.

La défaite de Missis Green ne m'surprint pas, et nou craithait qu'à ch'tèu' ou n'voudrait pas se r'mêler dans la politique, car oulle eut mains d'vouaix que le Sieur L'Brocq, le Communiste. Mais nou r'vérra ch't'ichin sûs lés rangs, car n'ou n'peut pas l'dêcouothagi, et comme j'l'ai dit pûs d'une fais, i' faut l'admither pour chonna.

I' pathait que certains employés des Etats s'en vont aver de pûs gros salaithes que nou-s-étthait creu pôssiblye mais, par chein qu'nou-s-en vait, chonna n's'applique pas ès membres des Etats. Le Sieur Venables, le brit couort, n'est pas content avec ch't'êtat d'choses et a un projet pour l'amender, mais je n'crais pas tch'il étha hardi d'succès ocquo. Une chose tch'est seuze et certaine ch'est qu'une fais que les membres des Etats s'sont payis, y'étha des candidats non pas par les doûzaines, mais par les chentaines, Et, parmi yeux, y'étha hardi d'femmes mathiées, tchi n'voudront pas continuer à prépather les r'pas pour lûs hommes, à laver la vaisselle et à soigni lûs mousses. Hélas, les pèthes de fanmil'ye et les pouôres pétiots!

Quant ès Connétablyes, y'étha p't'être tchiques changements, mais pas hardi, car même si y'a une élection ichin et là, i' n'se trouv'tha pas hardi d'candidats pour une djobbe tch'est si onéreuse chais jours, et tchi prend tout l'temps d'un homme. Ch'n'est pas uné bordée d'fun que d'être un Connétablye au jour d'agniet, mais, avec chonna, i' s'trouve tréjous tchitchun tch'a l'ambition de vaie les gens tch'i' rencontre li haller lûs chapé et l'adresser comme Moussieu l'Connétablye. J'me r'souveins d'yun tchi n'avait pas l'sou, mais tch'allait touos les matins visiter châque auberge dans sa pâraisse, étant seux que là il éthait une invitàtion à bèthe une fais. Membre d'une fanmeuse fanmil'ye, tout ch'tch'i' li mantchait ch'tait des sous, mais i' n'laissait pas chonna le dêrangi, et quand, à la fin, il crévit, nou li donnit de grandes funérailles. Sans doute, Moussieu, j'n'ai'pas besoin d'vos dithe tchèsqu'il 'tait.

Et n'en v'là assez pour agniet, car il est temps que je m'couoche.

PH'LIP
 

Viyiz étout:

 

Les Pages Jèrriaises