Moussieu l'Editeu,
Quand je r'vint d'la Ville avec la nouvelle que l'Projet pour le Service National, avec les amendements que l'Comité d'la D'fense a fait, avait pâssé sans opposition, la Merrienne voulut savé tout-d'suite si ch'tait fini. "Veur-tu m'dithe, Ph'lip," ou s'fit, "que ch'est décidé qu'nos garçons s'sont enviés en Angliétêrre pour faithe lûs service?"
"Nânin, Merrienne," j'l'y dit. "N'te fait pas d'mauvais sang, car y'a ocquo une chance. Dans tchiques semaines le Projet r'veindra d'vant la Chambre, et si y'a une mâjorité contre nou l'flianq'tha au royaume des taupes. Mais au moment n'y'a rain d'certain ni d'un bord ni d'l'autre. Comme je vais les choses che s'sa une affaithe de iunne ou deux vouaix."
"Mais absolûment," ou dit, "y'a assez d'bouons campagnards dans l's'Etats pour gâgni la bataille. Tu m'as tréjous dit qu'si les Membres d'Campagne sont solides sûs autchune tchéstchon, y n'peuvent sinon remporté. Tchèsqu'y l's'empêche ach'teu d'voté contre en bloc?"
"Eh bein, Merrienne," j'l'y dit, "ch'n'est pas si simplye comme tout chonna, car à qu'menchi, ch'est seux et certain qu'y'étha treize vouaix en Ville pour le Projet."
"Treize," ou dit, "n'est pas un numétho chanceux, mais continue."
"Dans les pâraisses," j'l'y dit, "comme je vais les choses, y'étha quatre vouaix contre nous à Saint-Sauveux; à Saint-Brelade deux ou même trais, et à Saint-Jean le Ph'lip Le Vésconte en f'tha iun d'pûs. V'la tchi nos fait un total d'au mains veingt. epis y n'faut pas oublié les Sénateurs. Nou n'peut pas donné un mandat à chais mêssieux-là."
"Et combain qu't'en conte de notre bord?"
"Chinq ou six, et si man caltchul est corrécte chu nombre-là suffitha, car si touos les membres étaient présents, une chose tchi n's'arriv'tha pas, le total ne s'sait qu'chinquante-deux. J'ai r'grét de l'dithe, Merrienne, mais je crains hardi qu'ch'est une affaithe pérdue."
"Dans chu cas-là," ou dit, "les Saint-Ouennais éthont p't'être ocquo un mot à dithe. Si toute la pâraisse se trouvait dans la Place Royale quand veindra l'jour tchitchuns d'chais Villais pouorraient touôné d'bord au lieu d'entré."
"Y n'faut pas s'y fié, Merrienne," j'l'y dit. "Y'a trop d'police en Ville de nos jours, et l'pûs hardi d'nos garçons n'voudrait pas s'trouvé en bouaite pour avé intérrompu la paix publique. Sans doute y'étha tout-plien d'campagnards dans la Place chu jour-là, mais je n'm'attends pas qu'y'étha du brit."
"Si ch'est d'même," ou dit, "faudra pensé à tchique autre manièthe. J'me r'souveins qu'man pèthe m'avait dit un bordée, qu'après une êlétion ichin à Saint-Ou, trais êlécteurs tch'éthaient fait la différence n'se présentitent pas pour voté parsque nou l's'avait soûlés l'sé de d'vant et y n'pouvaient pas bouogi. Crai-tu qu'nou pouôrrait êprouvé chonna?"
"Grand doux, nânin, Merrienne," j'l'y dit, en riant. "A qu'menchi, combain qu'tu crais tchi souôt'tait au jour d'agniet pour mettre un Député caud-bèthe. Pûs qu'chonna, n'y'a pas un riboteux dans toute la dgaingue. Les temps sont changis, ma vieille."
"Vèthe, malheutheusement," ou s'fit, "car autrement nous éthait peut invité trais ou quatre de yeux à v'nin pêtchi au baté à la Grève de Lecq, et si s'étaient trouvés en Ecreho ou ès Dirouailles par mêprinse nous éthait dit que ch'tait un acte de la Providence. Y dait y'avé tchique moyen, Ph'lip."
"Y'a ocquo l'temps," j'l'y dit, "mais franchement j'n'y vais pas cliait, et ch'est nâvrant pourtant d'savé qu'un couplye de vouaix d'mains d'un bord nos sauv'thaient."
"Ch'est ès Campagnards à faithe tchique dêmarche," ou dit. "Quant à mé, j'm'en vais considéthé la position à tête r'posée, et y faut qu'tu l'faiche étout. Si entre nos deux je n'pouvons pas pensé à tchique manièthe de reduithe l'opposition, je n'sommes pas Ph'lip et Merrienne du Portinfé!"
Ph'lip
Les Chroniques de Jersey 20/3/1954
Viyiz étout: