Moussieu l'Editeu,
"Oh, grand doux, tchi temps!" s'fit la Merrienne. "Nous avait dit que deustrais bouonnes achies f'thaient du bein à la têrre, mais j'en avons yeu asséz chutte niet pour un couplye d'mais. Et il en tchait acoquo comme si le ciel en avait pour je n'sais pas quantchi. Aide-mé à hallé mes cauches, Ph'lip, pour que j'aille à haut les changi."
Pour vos dithe, Moussieu, la Merrienne avait dêshallé pour soigni ses poules, et en crouâisant l'bel ou s'était prèsque êtrav'lée dans une mathe d'iau. Ou tait r'venue m'dithe que l'vent avait prèsque abattu san poulaillyi, et qu'sans doute y'avait des tuiles de bûchis au haut d'la maison. Par chein qu'oulle avait veu ch'tait seux et cértain qu'avait des mathes dans la mansarde étout!
Un mio pûs tard, étant assis aupi d'notre feu, ou s'trouvit mus. "Enfin, man Ph'lip," ou dit, "y n'faut pas s'gêné d'chonna. J'avons veu pièthe dans l'couothant d'notre vie et y n'y'a rain d'bûchi tchi n'peut pas être r'pathé. Ach'teu, as-tu pensé que ch'est d'main le drain jour de l'année, et que Dîmanche est l'Jour de l'An?"
"Oui, Merrienne," j'l'y dit, "et j'y pense ocqui. Chaque fais, quand veint l'preumyi d'Janvi, j'fais d'bouonnes resolutions."
"Vèthe," ou dit, "et dans p'tit d'temps tu l'as r'roupliées. I m'semblye que ch't'année, tu f'thais mûs, et mé étout, de pensé, pas à nous-mêmes mais à d'autres. Les maladies, par éxemplye, et y'en a hardi, nou dév'thait souhaité tch'y s'trouv'thont mûs bein vite et tch'y pouôrront dithe ès docteurs de fichi lus camp."
"Vèthe assez," j'l'y dit; chonna ne f'tha pas d'ma, mais la maladie ch'est une chose que nou n'peut pas tréjous gouverné, et y n'faut pas oublié que les docteurs, même quand y n'réussisent pas, ont fait d'lûs mûs. Mais puisque j'allons souhaité une bouonne année à plusieurs ch'est m'n'idée qu'nou pouorrait faithe pièthe que d'continué avec les férmiers, et d'éspethé tch'ils éthont une bouonne saison d'patates, car, tu sais, Merrienne, une pouore saison en chât'qu'thait hardi."
"Bein seux," ou s'fit, "nous pour les preumiers. Ach'teu, y m'veint dans la tête que nou dev'thait souhaité une bouonne année au Baillyi et aux Etats. Nou craint un mio pour le Baillyi, car il a trop à faithe, et n'a pas assez d'aide. Quant ès Etats, une bouonne année, mais étout pus d'bouon-sens et pûs d'êconomie. Y'a bein trop de dêpenses dans l'Assembliée d'nos jours."
"Les Connêtablyes, les Chantgniers, et toute la Police Honorifique," j'l'y dit: "Y n'faut pas l's'oublié."
"Damme, nan," ou dit, "car le jour que notre bouon vier système dispathaitra, Jêrri s'en îtha ès tchans. Pourtant y pathait qu'y'a hardi d'Villais et d'chais Angliais tch'y ne s'saient pas mârris si yun d'chais jours y n'y'avait que d'hommes en uniforme partout l'Ile."
"Un triste jour pour notre p'tite île, Merrienne," j'l'y dit, "mis ch'ne s'sa pas dans notre temps. quand y'a une vacance dans la Campagne, y s'trouve tréjous un candidat, ou même pûs. Et nou m'dit qu'même en Ville y'a bétôt une demié-douzaine de candidats pour le poste de Connêtablye."
"Mais," ou s'fit, "le poste n'est pas ocquant vacant."
"Nan," j'l'y dit, "mais nou s'attend tchy s'décid'da d'résigné yun d'chais jours, car y n'est pas bein raide. Mais il a bein sérvi sa pâraisse et faut souhaité tch'y se r'fétha. Tandis qu'y'a d'la vie y'a d'l'éspethance."
"Nous a tréjous ouï chonna, est ch'est vrai," ou dit. "Ach'teu, Ph'lip, y'en a-t'y d'autres à tch'y qu'nou pouorrait souhaité une bouonne année?"
"Oui, ma vielle," j'l'y dit, "y'en a tout-plien, mais en souhaitant une bouonne année à tout l'monde j'ne f'thons pas d'mêprinse. Tchèsque tu-en crais?"
Et la Merrienne s'accordit.
Ph'lip
Les Chroniques de Jersey 31/12/1955
Viyiz étout: