Moussieu l'Editeu
La Merrienne s'en va tchitter garder des poules. Hier matin, en dèjeunant, ou s'pliaignit qu'ou n'avait pas yeu un seul oeu pour des s'maines et ou m'dit qu'ou s'était r'souv'nu dé chein qu'sa mèthe, dans les mêmes circonstances, avait fait pour amender les choses.
'Ou les laissit toutes à bânon' ou dit, 'épis ou mint touos les mousses à les chasser d'un but du grand clios à l'autre, trais ou quatre fais. Il est vrai que y en eut une demie-douzaine ou d'même tchi crévitent de fatigue, mais l'restant, ayant yeu lûs leçon, s'mintent à pondre à tigues dé corps et produisitent des oeux en mâsse. J'm'en vais êprouver chenna d'main, Ph'lip, pour tachi de persuader ches pièrcheuses-là à faithe lûs d'vé.'
'Mais ma pouôre Merrienne' je m'fis, 'tu n'as pas d'mousses pour les chasser!'
'P't-être bein' ou dit, 'mais j'ai l'tchan, tchi s'sa content d'être main en liberté pour un p'tit d'temps.'
Et, Mousieu, ou laissit toutes les fichues poules à bânon dans l'clios drièthe la maison, epis ou ou s'en fut au tchian et dèfit sa chaine. Dans toute sa vie lé pouôre balloque n'avait pas yeu tant d''fun'. Mais, quand i'r'vint dans l'bel, puthant d'sueu et san mûsé cou'ert dé pliumes, i' fut bein content de s'fouôrrer dans l'fond d'sa câsse, car la Merrienne trouvit que sept de ses poules mantchaient, et que l'restant 'taient à mié-mortes. Quant ès oeux, I'n'y en avait autchune signe. Chein tchi reste d'la volaille autchune personne peut aver à bouon marchi!
Aprés l'thée, à ce sé, j'ai 'té bein près d'li d'mander s'ou s'fiait ocquo sus l'systeme d'sa méthe mais j'avais peux d'une explosion, ch'est en tchi j'mé si mint à pâsler d'autre chose. J'li ai ram'né à la mèmouaithe que j'avais prédit que y'éthait une deputâtion pour Chent'nyi à Saint Piérre chutte s'maine.
Ou s'est accordée que pour eune fais j'avais yeu raison. 'J'si seuze' oulle a ajouôté, 'qu'les pâraissiens ont bein chouaisi, car lé Sieur Egré dait faithe un raide bouon Chent'nyi. Embarrassé comme il est, I'dév'thaient li être bein r'connaissants, car I' n'a pas hardi d'aide sus sa ferme. Trais filles et pas un garçon; ch'est grand dommage.'
'Véthe' j'ai dit, 'mais s'i'tait v'nu m'consulter en temps j'éthais p't-être peut il donner un mio d'avis. Té r'souveins-tu, Merrienne, quand tu'avais dans les dgiêx-huit ans et mé dgiêx-neuf, nou-s-allait au thée des Trais Pâraisses, nou formait un ring nou mettait un couplye dans le mitan, epis nou chantait: 'Now you're married, I wish you joy; first a girl and then a boy'? Ch'tait d'même que je c'menchimes, nous. La vie 'tait bouonne dans chu temps-la.'
Oulle a souôrit. 'Epis les jumieaux tchi vintent après?' oulle a d'mandé.
'Chenna' j'ai dit, 'ch'tait l'année que tout ch'que nou méttait dans la têrre produisait l'doublye. Y'avait tant d'patates que nou n'pouvait pas les vendre, et les pommes à cidre se vendaient chinq ch'lins l'quartchi. Ch'est eune drôle dé chose que la natuthe!'
'Ch'n'est pas seulement la natuthe qu'est drôle' ou s'est fait, 'car man bouonnehomme peut y'être étout. Mais, dis-mé, Ph'lip, tchèsqu'i' s'pâsse dans l's Etats, car j'n'ai pas yeu l'temps d'lèthe ches longs rapports sus la gâzette. Avec chenna, I'm'semblye que j'ai r'mertchi que la 'Post' n'aime pas trop l'Sénateur Troy.'
'La 'Post', ma chiethe' j'ai dit 'aime autant l'Sénateur Troy comme l'Sénateur Troy aime la 'Post'. Il a apprint, comme bein d'autres, que nou peut faithe autant d'bétises en allant trop vite comme en allant trop douochement. Enfin il a gâgni san point au sujet d'ches maisons tout prés du Hàvre des Pas tch'appartenaient au Gouvernement. Ch'tait là qu'les soudards mathiés d'meuthaient avec lûs familles, et ach'teu I'n'est tchestchion que d'la têrre en drièthe. Quand tout s'sa fini, y'étha des louogements pour des chents familles.'
'Bétôt temps!' ou s'est faite sequement, 'mais es-tu seux qu'les visiteurs n'les voudront pas? Tu sais aussi bein comme mé, Ph'lip, que même si toute la populâtion d'la Ville avait a couochi d'hors tout l'éte, le Comité du Tourisme prendait bouon soin que les visiteurs ne souffrithaient pas. Pout quatre mais, Jerri appartcheint es visiteurs, et non pas ès Jerriais.'
'Ch'n'est pas tout a fait si pièthe' j'ai dit, 'mais ch'est seux que ch't'été nou s'sa pûs à s'n aise dans les fonds d'la campagne que dans la Rue d'Drièthe.'
'Quant a mé' oulle a dit, 'je n'mettrai pas les pids en ville l'année passée, un sam'di matin, j'fus bétôt eune démi'euthe a marchi-si nou pouvait app'ler chenna marchi-du monument a Pierre Lé Sueur jusqu'au Marchi. J'tais capuchie, j'tais prèsque étrav'lée, et mes pouôres ortets 'taient dans un triste état. Et sus la route nou n'tait pas en seûzeté d'sa vie. Enfin, Ph'lip, I'faut espéther que n'y étha pas trop d'calamités, mais j'en crains hardi. Changeant d'sujet, j'm'en vais té r'demander ocquo une fais si tu crais que y'étha une changement d'Connêtablye à Saint Louothains au mais d'Avri. Est-che oui ou non? Té, tchi vais tant d'monde, tu dév'thais saver.'
'Si faut que j'décide' j'ai raiponnu, 'j'si prèsque certain que n'y étha pas d'changement.'
'Et en Ville, est-che ch't'année étout?'
'Oui' j'li ai dit, 'et nou pâsle déja de quatre ou chinq candidats.'
Ph'lip
28 January 1960
Viyiz étout: