à Portinfé,
Saint Ou.
Moussieu l'Editeu,
Quand je m'rêvillyis mêrcredi matin dans les chînq tcheuthes, et vis l'temps, j'abandonnis l'idée d'aller à Springfield pour lé grand "show" de l'Ile. Pourtant, je m'étais fait fête de y'aller, car ch'n'est pas souvent, dans l'couothant d'ma longue vie, que j'ai mantchi d'être là pour vaie les pûs belles bêtes que Jèrri peut produithe et les pûs belles bêtes dé juges. Mais, après dêjeuné, après que j'avais fait une touônnée dans l'gardin, et veu pour mé-même comme tout avait cru dépis les grandes achies dépis lundi, j'prins un mio d'couothage, car i' m'sembliait que toute la natuthe se rêjouissait, et que j'n'avais pas d'raison pour être dêcouothagi. Après tout, ch'tait l' "show" du mais d'août, et ch'n'tait pas probablye que y'éthait grand chose d'extra, comme si ch'avait 'té l' "show" du mais d'mai ou du mais d'octobre. Là je m'trompais un mio, comme j'vos dithait présentement.
Chein tchi changit compliètement l'appathence des choses ch'tait que dans les djais heuthes un bouon vaisîn entrit dans l'bel, et me d'mandit si j'îthais au "show" avec li. Le temps n'tait pas ocquo des pûs bé, mais j'me faisais prèsque seux que si j'restais à la maison, la Merrienne, tchi souffre ocquo chais jours d'un ma dans une partie du corps que nou n'mentionne pas en compagnie, me trouv'thait tchique sale djobbe à faithe, et don, j'mîns ma câsaque et man muffleur, et nos v'là hors.
Et j'fus bein content après d'aver prînt couothage, car le temps s'rembellit, et si je n'vis pas hardi des g'nîches r'nouv'llées, ayant arrivé trop tard, j'vis les jeunes vaques, les vielles vaques, et chein que j'voulais vaie pûs qu'autchune chose, lé championnat. Le réferee fut app'lé pour décider entre deux bouonnes bêtes, et i' fit chein que j'éthais fait, car i' donnit la préféthence à la vaque à Eugène Perrédès, après une assez longue examinâtion. Ch'est une vaque qu'Eugène avait accaté du Earl of Jersey, quand i' s'défit d'une partie d'ses bêtes, et i' n'y a pas autchune doute que ch'tait un raide bouon achat. Lé Sieur Lé Cornu, d'Saint Louothains, fit réserve, et l'Douglas Richardson en appréchit étout. A prendre la clâsse tout travers, ou 'tait bein miyeuthe que les vielles vaques, et p't'être miyeuthe que chein qu'nou-s-a veu tchiquefais au mais d'août.
Après chonna, Moussieu, je m'trouvis ouèsque y'avait des rafraîchissements. Après tout, je m'dit, les vièrs fermiers dîsaient tréjous, et avec raison, sans doute, que sans tchiquechose à bèthe, i' n'y éthait pas d' "shows" d'bêtes, et je n'viyais pas d'ma à accepter un p'tit vèrre ou deux tchi m'fûtent offerts par des amîns que j'trouvis là. Mais Moussieu, je trouvis étout tchiquechose de r'marquablye, car parmi la compagnie i' y'avait chînq hommes de ma connaissance tch'avaient vêtchu entre yeux pâssant quatre chent trente ans. Lé vieillard du lot ch'tait l'Walter Gruchy, né ès Champs Rault, à la Trin'té, y'a nonante-sept ans. Épis y'avait lé 'Douar' Lé Brô, lé Fred de Gruchy, dé Rozé, lé Bill d'la Cour, et, l'pûs jeune, lé Sieur Britton, d'Saint Sauveux, tchi n'a que septante-sept ans. Pour s'n âge lé Walter Gruchy est pûs que r'marquablye, mais la drôle dé chose est que n'y a pas dans les chînq un seu tchi n'bé pas. Quand j l'dis à la Merrienne, ou fit une grimache, et s'contentit d'chonna, mais j'vis bein qu'oulle éthait voulu faithe tchiques observâtions.
Quand j'eus fini m'n histouaithe du "show", la Merrienne se mînt à pâsler d'la jeune d'mouaiselle angliaise tch'avait nagi dé Djernézi à Jèrri après aver 'té dans l'ieau pour pûs d'tchînze heuthes. "J'ai tréjous dit," ou s'fit, "que les femmes ont bein pûs d'couothage que l's hommes, et pûs d'dêtermination. Montre-mé l'homme tchi pouôrrait en faithe autant."
"Ch'n'est pas probablye que j'en trouv'thais yun," j'li dis, "mais y'a ocquo une chose que chutte d'mouaiselle n'a pas fait tchi fut fait pour yun d'mes anchêtres, un Amice Lé Gresley, tch'avait mathié une Saint Ouënnaise tchi li m'nit une vie d'tchan."
"Sans doute i' l'méthitait," ou sfit, "mais tchèsque est l'histouaithe que tu voudrais m'raconter et tchèsqu'i' fit que chutte jeune angliaise n'a pas fait ?"
"Ou n'a jamais nagi à travers la Mathe au Seigneur," j'li dis, "comme lé Amice le fit une séthée quand i' r'venait d'la Ville à pid et mantchit san qu'min en appréchant de l'Etâ. I' disait tréjous tch'i' 'tait sobre dans l'temps, mais personne ne l'criyait, car tout l'monde connaissaient s'n habitude de n'être pas sobre sinon quand i' dormait."
"A ch'teu'," ou s'fit, changeant d'sujet, 'dis-mé si tu as ouï autchune chose dé nouvé au sujet des élections à Saint Louothains et en Ville."
Eh bein, Merrienne," j'li dis, "j'ai ouï qu'à Saint Louothains la situâtion est complitchie par lé fait que l'John Baudains ne s'en va pas abandonner la djobbe ocquo, car i' veur que l'rât s'sait péyi d'vant qu'y tchitte."
"Et combein longtemps chonna s'en va prendre," ou d'mandit.
"Ch'est accordant," j'li dis, "mais i' s'pouôrrait que les deux candidats lé Ph'lip Lé Marquand et l'Chantgnyi Cooper, éthont à arrêter jusqu'au mais d'mars de l'année tchi veint. Ch'est longtemps, mais lé John Baudains est ocquo Connêtablye, et ch'est san drouait d'rester en office s'i' veur. Dans l'entretemps les deux candidats peuvent rester ousqu'i' sont et vivre en espéthance. I' n'gâgnent rein d'aller s'pliaindre au Connêtablye, car il a tréjous fait comme il a voulu, et i' n's'en va pas changi à ch'teu'."
"Et en Ville ?" ou d'mandit, "tchèsque en est là ?"
"Ch'est bein difficile d'dithe," j'raiponnis, "mais j'crais que l'Député Venables a pûs d'chance que je n'li éthais donné y'a tchînze jours. Y'en a tchi qu'menchent à craithe que l'Sieur Dupré éthait peut attendre un mio pûs longtemps d'vant s'mettre candidat pour Sénateur. Pour dithe vrai, je n'crais pas que l's électeurs s'en vont dêshaller en grand nombre, car ni yun ni l'autre des deux candidats peut s'compter populaithe dans les pâraisses."
"Et té et mé," ou d'mandit, "tchèsque j'allons faithe ?"
"Quant à mé, ma vielle, j'ai décidé d'voter pour lé Député Venables. Quand à té, tu f'thas comme dé couôtumme comme tu voudras."
"Et," ou s'fit, "pour une fais j'allons nos trouver du même côté. Deux vouaix pour le Député Venables !"
Ph'lip
18/8/1962
Viyiz étout: