Moussieu l'Editeu,
Vraiement, je n'sais pas tchêsque j'm'en vais faithe de la Merrienne. Je s'y persuadé qu'ou qu'menche à perdre la tête.
Imaginous que quand, y a un couplye d'séthées, je l'y d'mandit s'oulle avait à la fin chouâisi ses douze sénateurs ou m'raiponnit sèquement qu'oulle en avait plien l'dos des Sénateurs et qu'ou n'voulait pas en r'ouï pâslé.
'Je sis v'nue à réfliéchi' ou dit 'que s'nou vote pour yun ou pour un autre, ch'est toute la même chose. V'la tchi ne f'tha autchune difféthence tchêsque y veint nou tchêsque y n'y veint pon, et j'ai tait bête de m'en troublié la tête. Ch'est tout du gniolin.'
'Les v'la, chais mêssieux' ou continuit 'touos les siers, montés sûs des pliatformes, à faithe toutes sortes d'promésses pour tâchi d'attrapé des vouâix et les gens bêtes assez d'les craithe. Yun tch'y lus promett'ta l'solé, la lune et les êtélles veindra au haut d'la liste. Ch'est incriyable que les êlecteurs se laissent happé par de patheils individus.'
'Mais, ma pouôre Merrienne' j'l'y dit 'tchêsque tu as don. Tu n'pâslais pas d'même la s'maine pâssée.'
'P't'être ben' ou raiponnit 'mais la niet pâssée, tandis qu'tu ronfliais à châtchi tout, je n'pouvais pas dormi et j'me sis minse à pensé.'
'J't'avais djérni' j'l'y dit 'qu'une femme de t'n'âge ne dév'thait pas mangi du gras lard pour san soupé. Et une tâsse de lait caud t'éthait fait pus d'bein que tout chu cidre-là. Mais tu'est si têtoigne.'
'N'en v'la assez' ou s'fit. 'Ch'est m'n'estouma, et pas l'tchein et j'mang'geai chen que j'voudrai. Mais j'ai tréjous ouï qu'nou vait hardi cliait dans l'mitan d'la niet et achteu j'en sis seûze. J'les considéthit yun à yun, chais candidats, et j'vint à la conclûsion que n'y'en avait pas yun tchi méthitait eune vouaix.'
'Tu dév'thais avé grand'honte de pâslé d'même' j'l'y dit. 'Si ch'avait tait pliene lune, j'éthais dit que ch'tait chenna, mais -'
La Merrienne, m'intérrompit. 'Eune autre pathole' ou dit, me m'nichant auvec la cannée d'iau caude 'et j'te fiche chennechin à la tête. Achteu, tu f'thas comme tu voudras le jour de l'êlection, mais quant à mé, j'reste ichîn.'
'N'sait pas si bête' je l'y dit. 'Imagine-té si tout l'monde allaient faithe la même chose. N'y'ethait pas un seul Sénateur d'êlu.'
'Tant mûs' ou s'fit. 'Jèrri pouorrait s'en pâssé. Ben seûx que d'ma part je n'en plieuth'thais pas.'
'Ch'n'est pas la tchestchon' j'l'y dit, sévèthement. 'Tu'as eune vouaix, et tu dév'thais t'en servi, autrement tu n'la méthite pon.'
'Tu peux l'avé pour quatre sous, ma vouaix' ou dit, en se l'vant. 'Et si tes circonstances ne t'pérmettent pon d'payi argent comptant, j'te donn'nai crédit jusqu'à la saison. Ach'teu veint-t'en t'couchi.'
PH'LIP
6/11/1948
Viyiz étout: