Moussieu l'Editeu,
La Merrienne se rêjouait hier quand ou liut que l'Comité d'la D'fense avait abandonné l'idée d'envié nos garçons en Angliétêrre pour faithe lûs sérvice.
"Hourrah!" ou s'fit. "Ch'est une victouaithe pour notre Député et pour notre Jack Le Mérquand. Bein seux tch'y métt'ront les couleurs à haut agniet."
"Eh bein, Merrienne," j'l'y dit, "quand au Mâjeur de Gruchy, je n's'y pas trop seux, car il a tait soudard l'y-même pour des années, et y n'a jamais oppôsé les deux ans d'sérvice, mais il a insisté, du tout qu'mench'ment que nos garçons pouvaient faithe lûs sérvice à La Grève. Et, entre nous je n'crais pas tch'il approuvtha d'abandonné l'idée compliétement. Y n'a pas tait soudard pour rain, notre Mâjeur. Mais quand a notre Jack, l'y il est trop jeune pour avé sérvie dans la Milice, et la soudardethie n'l'y va pas. Y faut dithe, Merrienne, que y'a pûs d'une chose à considéthé, car y m'semblye qu'un garçon de djais-huit à vingt ans dév'thait savé comment manié une arme et faithe des form-fours et des by the right quick march, comme dans notre temps. Y faut avoué étout qu'un mio de discipline ne lûs f'thait pas d'ma. Et, après tout, nou n'enhannait pas dans la vieille Milice. J'ai pâssé d'bouons temps quand j'tais Corpotha, et qu'nous allait tithé ès Bianches Banques et à Crabbé avec un patchet d'cartes et un bathi d'bièthe."
"P't'être-bein," ou dit, "mais y'en avait pûs d'yun tch'y s'n'allait tout drait au liet en r'venant d'chais bordées-là. Enfin, ch'est tout pâssé et j'ne r'vêrrons pas chais jours-là. Ach'teu, Ph'lip, est-che vrai que l's'Etats s'en vont sauvé un tas d'sous en abandonnant l'idée du service militaire? Nou m'a dit chonna."
"Eh bein, oui, par chein qu'nous en comprend," j'l'y dit, "mais n'te gène pas. Nos Etats séthont comment les gaspillyi en d'autres diréctions. Chutte somme-là ch'n'est qu'une goutte d'liau dans la baie d'Saint-Ou. Ch'est comme si j'te donnais trais liards pour un tchinzejours à Paris."
"J'nîthais pas lien avec chutte somme-là, bein seux," ou dit, "mais ach'teu Ph'lip, y'a yeu une grande et longue distchussion dans l's'Êtats au sujet des maisons tchi sont ocquo à bâti. J'ai liut chonna, mais j'n'en ai pas comprint la maintchi. Tchèsqu'y y'a don tchi n'va pas bein?"
"Plusieurs chose," j'l'y dit, "mais au fond ch'est une tchéstchon d'sous. Pour tchique temps l's'Etats ont prêté des sous ès couples tch'y voulaient bâti lûs maisons à p'tit intéthet, mais ils ont dêcouvert que l'année passée y 'tait a r'tou de tchinze mille louis et ont décidé que chonna n'peut pas continué, et don, à l'av'nîn, y faudra qu'les gens paient un mio pûs d'intéthet."
"A ma veue ch'n'est qu'raisonnablye," ou dit, "mais pourtchi chais longs discours, quand l'affaithe est si simplye. Notre Jack Le Mérquand, par exemplye, n'en finie pas, et y n'est pas l'seul. J'ai r'mértchi étout qu'ch'est tréjous les mêmes tch'adressent la Chambre. Les trais-quarts ne disent jamais une pathole."
"Véthe," j'l'y dit, "tu vais Merrienne, y'a d's'hommes tch'ont la langue bein pendus; mais y'en a étout tch'y n'sont pas d'même. Ch'n'est pas comme les femmes, tch'y peuvent toutes baillyi d'lûs bécques en tout temps et en toute occâsion. Quant au Jack Le Merquand, ch'est un prédicateur local mantchi. Si par chance y s'y'était mint il éthait convérti la pâraisse de Saint-Ou dans trais mais."
"Eh," s'fit la Merrienne, séquement," ch'est une chose de tchi qu'la pâraisse de Saint-Ou a grand besoin!"
Ph'lip
25/2/1956
Viyiz étout: