Moussieu l'Editeur,
Ch'est sûs l'tard que j'vos êcris agniet, mais j'ai tait ben embarrasé tout l'jour, épis j'ai perdu pûs d'une heuthe à matin tachant d'explitchi à la Merrienne le report de chais mêssieurs tch'y taient v'nus au mais d'septembre pour vais si notre système de gouvernement pouvait faithe.
Quand la gâzette est v'nue, la Merrienne, comme de couôtume m'la arrachie d'la main, et s'est assise dans sa grand'chaise pour la lièthe.
''Et grand doûx d'la vie, tchèsque-est tout chu gniolin-là?'' qu'ou s'est faite quand oulle a veu l'cont'nu. ''Y'en a huit pages, et je s'sais tout l'jour à liéthe chonna. Gâs-mé chais portraits et chais grôsses lettres. Y'en a pûs long que si ch'tait l'show des trais pâraisses ou une élection d'chantgniers à Saint-Ou.''
''Ch'est l'rapport des gârs tch'y taient v'nus d'Angliéterre au s'tembre,'' j'l'y dit, ''et ch'est hardi important. Baille-mé la gâzette pour vais tchèsqu'y veulent.''
''Eh ben, mais dêpêche-té,'' qu'ou me dit, en m'passant l'papi. ''Ne m'garde pas ichin tout l'jour, ou ben tu n'ethas pas d'crêpes pour tant dîné.''
Et don, j'm'y mint, et au but d'une dém'ieuthe je qu'menchit.
''Y nos laissent le Baillyi'' j'l'y dit.
''Et pourtchi pas?'' ou s'fit. ''Ch'n'est pas un mauvais gârs. Y n'a jamais fait d'ma à personne.''
''Y'étha siez Juges dans l's'Etats, et six dans la Cour,'' je continuit.
''Oh bon! et tchèsque est l'idée?''
''Je n'sait pas trop,'' j'l'y raiponnit, ''mais j'crait ben qu'les siens pour la Cour éthont à savé tchiquechose de la louai.''
''Il est bétôt temps,'' s'fit la bouonnefemme. ''Mais l's'autres, éthont-t'y à savé la louai étout?''
''Nânin. Mais quant-à mé j'voudrais y vais siez bouons fermiers.''
''Véthe'' dit Merrienne ''d's'hommes tch'y pouôrront s'mâté contre chais Villais. Mais est-che-là tout?''
''Les Connêtablyes continuêthont comme de couôtume,'' j'raiponnit, ''mais les Recteurs ne s'sont pûs dans l's'Etats.''
''Est-che vrai, chonna?''
''Mais ben seux qu'ch'est vrai.'' j'l'y dit. ''Tu peux l'vais té-même sûs le pâpi.''
La Merrienne fit une grimache. ''Quant ès Connètablyes, j'n'ai rain à dithe, car sans yeaûx l'rât hautchithait dans toutes les parâisses, mais j'n'approuve pas d'fichi les Recteurs à la porte. A qu'menchi tchêsque y liétha la prièthe?''
''Le Doyen s'sa permint d'otchupé un siége,'' j'l'y dit ''mais y n'étha pas l'drouait d'dithe un mot. Avec chonna je n'doute pas t'ch'y pouôrra faithe la prièthe.''
"Et quand y ne s'sa pas là?''
''Ah, dame! Je ne sais pas,'' j'l'y dit, ''P't'être le Baillyi, ou yun des Juges.''
''Et p't'être personne,'' ou s'fit. ''Tant pûs qu'les temps changent, tant piéthe tchi sont. Et y'a-t'-i autre chose, ou ben es-tu fini?''
''Y'a deus-trais mots ichin,'' j'l'y dit, ''au sujets des dêpenses d'une êlection. Y voudraient une louai fixant le montant d'sous qu'un candidat pouôrra dêpensé.''
Sûs chonna, la Merrienne s'mint à rithe. ''Ah, ben, n'en v'la une bouonne,'' qu'ou s'fit, ''Que j'voudrais la vais mé, chutte louai. Faut-y tch'y s'saient simplyes chais mêssieurs.''
''Pas dutout,'' j'l'y dit, ''y'a une louais en Angliéterre.''
''P't'être ben,'' raiponnit Merrienne, ''mais Angliéterre n'est pas Jêrri''
Ph'lip
Morning News 29/3/1947
Viyiz étout: