à Portînfé,
Saint Ou.
Moussieu l'Editeu
Lé r'sultat de l'élection en Ville me surprînt hardi, pas par la victouaithe du Sieur Jeune, car nou l'attendait, mais par le nombre dé vouaix pour Norman Lé Brô, et le p'tit nombre pour lé Sieur Cronshaw. Nou peut vaie à ch'teu' que si l'Sieur Jeune n'avait pas prînt, j'éthions yeu un Communiste dans l's Êtats pour la preumié fais. Si jamais un homme a raison d'être dêcouothagi ch'est l'Sieur Cronshaw, et pourtant je n'voudrais pas gagi tch'i' n'rêprouvtha pas un mio pûs tard. I' bliaume les Méthodistes pour sa rude dêfaite, dîsant tch'il est Anglyican, et y'a tréjous 'té, mais par le pouôre nombre dé vouaix qu'l's Anglyicans lî donnîtent, i' n'eut pas grand support dé yeux. Lé Sieur Jeune ne d'vait pas aver yeu un seul moment d'anxiêté, et à ch'teu' nou s'en va vaie tchèsqu'i' f'tha dans l's Êtats. Sans doute i' d'veindra membre bein vite de pûs d'iun des importants comités, et i' s'trouv'tha hardi otchupé, car ch'est là que prèsque tout l'travas est fait. Sans doute étout, i' ne s'sa pas satisfait d'êcouter, car il a la langue bein pendue et bétôt nou pouôrrait l'vaie à faithe des longs discours. enfîn, Moussieu, à ch'teu' tch'il a rêussi tout ch'que nou peut li souhaiter ch'est longue vie, bouonne santé et tout succès dans la vie politique! La Merrienne, tchi n'a janmais aimé les Députés d'la Ville, dit qu'ou s'en va arrêter pour vaie si lé nouvieau v'nu vaut mûs que tout l'restant d'vant décider d'un bord ou d'l'autre.
"Méridian", d'la "Post", a êcrit de chein tch'il appèle une drôle de cause d'vant la Cour Royale l'autre jour, quand un homme fut envié en prîson par un créanchier pour une grôsse somme. Ch'est vrai assez que la vielle louai tchi permet chonna n'est pas souvent invotchie d'nos jours, mais dans les vièrs temps ch'tait bein difféthent. quand un créanchier n'accordait pas avec tchique mînséthablye i' li faisait arrêté par le Dénonciateur et li mînt en prîson pour un an et un jour, se faisant responsablye dans l'entretemps pour san maintchain au taux d'un ch'lîn par jour. Nou n'a jamais ouï de personne tchi restit là pour lé terme de trais chents et souasante-siez jours mais je n'crais pas que hardi d'monde savent qu'un jour yun des Recteurs se trouvit enfreumé là. Ch'tait le Révérend William du Heaume, Recteur d'la Trin'té, tchi n'avait un seu amîn dans la pâraisse, tchi d'vait des sous partout, et tchi n'tait presque jamais sobre.
Pour s'en dêfaithe, les pâraissiens chouâisîtent l'occasion d'la preumié vîsite de l'Evêque de Winchester, et quand vînt l'grand jour, l'Evêque sé trouvit au magnyi d'la Trin'té pour r'chever les pâraissiens dans l'arlévée. Quand vînt l'heuthe i' vit une longue procession ramonter l'avenue. Lé Connêtablye 'tait là, les Changnièrs, les Protchutheux du Bein Publyic, et une grande foule de pâraissiens. Mais, d'mandit l'Êvêque, ouèsque était l'Recteur? Quand i' lî fut dit que chu matîn-là l'Recteur avait 'té mînt en prîson pour dette par yun de ses nombreux créanchiers, et que toute la pâraisse voulait s'en dêfaithe, i' châtchit la tête et dit qué ch'tait r'grettablye mais étout que ch'tait impôssiblye. Il éthait fallu bein pûs qu'chonna pour l'dêpriver d'san rectorat. Et don les pâraissiens, bein desappointés eutent à mettre lûs Recteur en liberté, et pour l'restant d'sa vie i' continuit à lûs faithe d'la mînsèthe. I' mouothit bein d's années après, et quand i' s'en fut ouèsque, sans doute, touos les Recteurs vont quand i' tchittent la têrre, il avait 'té là pour chînquante-deux ans.
J'eûmes une agréable surprînse l'autre jour quand nou nos apportit un bouon fricot d'paisson. Trais ou quatre d'nos amins avaient 'té pâsser tchiques jours à l'Avathîzon et avaient fait une bouonne pêque. J'lus d'mandis s'ils avaient jamais ouï d'la bordée qu'une femme mathiée avait pâssé la niet là avec quatre hommes, et i' m'dîtent que nennîn. À ch'teu', Moussieu, j'y'ai 'té plusieurs fais à la tour, tchi fut bâtie dans l'temps du fanmeux Napoléon. Ch'est une vraie fortéresse, mais au jour d'agniet i' n'y a pas d'doute que tchiques bouons coups d'canon la mett'raient par têrre. Dans man temps nou-s-y allait du "slip" près d'la fameuse aubèrge à Mary Jane Lé Vêsconte, à bâsse-ieau, et trais quarts-d'heuthe après nou s'trouvait là. Y'avait une espèce de tchuîsine, ouèsque nou mangeait: y'avait un souôtêrrain pour lé bouais et l'tchèrbon, épis à haut y'avait une chambre avec un immense liet grand assez pour au mains quatre personnes.
Quant à la femme mathiée, s'n homme était là, et dans la séthee, i' s'en fut avec les trais autres, la laissant toute seule. Vînt un temps qu'ou voulait dormi, et ou monte à haut, sé deshabillye et s'met au liet.
J'n'ai jamais peut dêcouvri la véthité dé chein tchi s'pâssit dans chu grand liet, mais nou veur dithe que l'préchain matîn ou n'voulit pas s'en raller siez-li, et qu'ou restit là pour un autre quatre jours, quand un hèrnais vînt la transporter à têrre parsqu'ou dîsait qu'ou 'tait trop lâssée pour marchi, chein tchi n'est p't'être pas surprénant!
À ch'teu', Moussieu, ou voudrez savez, sans doute, si j'ai des nouvelles de l'élection à Saint Louothains. Eh bein le Reg. Baudains ne prend pas, car i' dit tch'il a tout plien à faithe siez-li dans san gardîn et à tachi d'empêchi la maladie d'exterminer ses tomates. V'là tchi laisse lé Ph'lip Lé Mèrquand et l'Chantgni Cooper, et si j'voulais gagi j'mett'rais une pièche d'êtchu sûs châtchun pour être seux de n'perdre rein et d'être du bouon bord. La Merrienne est hardi d'la même opinion, mais oulle est un mio gênée, car ou n'sait pas comment que l'John Baudains, après tant d'années à la tête des affaithes, s'en va pâsser san temps. Ch'est bein seux que pour une pôse i' trouv'tha la pôsition difficile, mais j'crais que d'vant long i' s'accouotum'tha, car lé couothage ne n'li a jamais mantchi, étant un Baudains. La Merrienne, tchi n'a rein contre li à ch'teu', espèthe de l'trouver yun d'chais jours pour châtchi sa main, et li souhaiter bein d's années de r'pos et d'santé. Oulle est d'même, ma bouonnefemme: ou peut en aver contre vous un jour, et s'en r'penti l'préchain, et j'ai bouonne raison de l'saver.
La s'maine pâssée, Moussieu, ou vos r'souveindrez que j'promîns à la Merrienne de li faithe bâti une salle dé bain et une autre chose tchi la gardétha à la maison quand jusqu'à ch'teu' oulle a yeu à faithe une prom'nade jusqu'au bas du gardîn. eh bein, j'ai donné l's ordres et j'attends les travailleurs la s'maine tchi veint, mais j'n'ai pas l'sou, et jusqu' ichîn j'n'ai pas peut persuader autchune personne d'mé v'nn en aide. Si n'me veint pas de s'cours, j'si prèsque seux d'être dêcliathé en d's'astre, ou même de m'trouver dans la même situâtion comme lé Recteur d'la Trin'té aut'fais, mais li i' n'fut là que pour un jour, et pu r'prendre sa djobbe tout d'suite, mais mé j'pouôrrais en aver pour l'restant d'ma vie. Un an et un jour ch'est longtemps, Moussieu, et j'ai d'la peine à craithe que Portînfé r'vêrrait san vièr Ph'lip.
Chein tchi n'amende pas les choses, Moussieu, ch'est que man ma dans l'dos a empliéthi, et que chais jours j'ai d'la peine à sorti d'ma tchaîse. Lé docteu m'dit que j'souffre d'un ma bein pièthe qu'un simplye ma dans l'dos, et i' n'est pas seux que y'a autchune dgéthîson. Mais j'm'en vais vivre en espéthance quand-même, car je n'crais pas qu'la Providence tchi m'a souôst'nu jusqu'ichîn, s'en va m'abandonner sûs mes vièrs jours. Ch'est pourtchi, Moussieu, à bétôt pour chutte semaine, espéthant que y'étha d'miyeu nouvelles la s'maine tchi veint.
Ph'lip
Viyiz étout: