Les Pages Jèrriaises

Sonnet, composé en pannique

En Arcadie, les mittes êcliatchaient les satythes;
les bieaux bèrgers ligouaîsaient les déêsses
dans les bouaîs'sies d'louothi, où'est qu'les Muses bragies rithent
du vîn couothant avaû lus seins et tchiêsses.

Mais v'là un brit d'chabots tchi veindraient faithe frémeu;
ses dgéthets d'biche volaient coumme un co d'vent.
Les satythes lus fiêsaient, les mittes êcappaient, ieux,
en piaillant et paonnant l'avant à Pan!

Achteu ches dgieux sont hors. Nou n'noue d'aut' siez les mittes.
Les chentaures né font d'aut' la carre ès nŷmphes.
Sélenne n'est d'aut' la leune: j'avons nos satellites
et nos fîsées... Mais d'un co r'sonn'na l'înf-

-èrnale bueûl'lie d'un brai divîn et vyi,
et Pan r'chabol'la 'chîn pouor nos faithe pannitchi!

 

Geraint Jennings

 

 

Viyiz étout:

 

Les Pages Jèrriaises