|
À haûter souos ches branques, j'y vai un vèrt vailyi hâvré dans chu gardîn d'espé et d'Hespéthides; Ch'est un navithe bragi, ch'est man baté d'pommyi; J'lanch'chai mén odyssée sus un fièr fliot dé cidre, eune brîsette dé Belles Fil'yes, et l'rouôlais d'Doux Rom'thi. Ma dreine séthée à tèrre – jé fais vaile à l'assinne sus l'ciel dé bliues mathées, la breue d'eune belle bouaîs'sie, pouor vither vèrs l'avoût. J'rêvache dans les tchêtinnes d'ma cartchaîson dé frits, dé d'si et d'ivrouongn'nie. Né v'chîn ma marchandise, ma richesse envitouée dé Musé d'Boeu, d'Côtard, dé Têtard et d'Caplyi, chèrgie d'amours juseurs, dé douocheurs adouothées. Eune plyie d'pommes êtampées, eune dêtchèrque dg'ieau-dé-vie; v'là tchi mouol'la ma langue, chu pur jus d'l'ochéan arrouôs'sa mes pensées. Les louêmes douoches et louochies montent vèrs les branques et banques, raffraîchissant mes chants. J'arrive, ma douoche-améthe! La saîson d'èrlâch'chie veindra ès navidgants amathés sus l'mat'nas dé pâssions et d'pépîns, dé mille amours meûthis, èrteurtchis et trîntchis, tchilyis et pitchis bas. Embraichi ès réchinnes, amathé souos l'pommyi, j'sis înnondé et n'yé dans tén amour litchide tchi d'goutte des p'tites brantchettes – jé chuche tes frits dé d'si; j'ai gouôté ta pomme d'or dans l'gardîn d's Hespéthides. Geraint Jennings 2004 |
Viyiz étout: