|
Eune rose mathée dé pétales dé tchoeuryi a mouoilli lé pavé ensolilyi; les c'mîns sont arrouôsés et parfunmés. Lé grannit fèrtile s'mé à la volée, êparpilyi dé pavots et dé paithes, s'en va êt' douothé du doux jus dé mouaithes. Les jaunes cats lus spalment, calmes, êcoquevilyis, accliutchis coumme des cocannettes cratchies; lus grîns - des pitchets d'roses, aigres et aîdgus. Nou chuche lé trafi tchi boule coumme du jus, et méjeu tchait par morcieaux et magie, et dêmêlé par des piègnes dé chorchi. Un feu ortcheux nos brûle et bangne dé d'si, lavant nos langues dé jus d'limon et d'myi. Les muthâles, mucres dé myrrhe, dgèrtent nos gardîns, èrrosinnant les pommes et l'romathîn. Les preunes dé Damas tchi dêtchèrquent acouo dêtourbent les êtchutheurs et l's êtchèrbots. Les paons et paontêsses juquent dans les paithièrs; d'un ambron, l'ambrais êcale touos les ièrs ès amouotheurs amathés dans les mielles. Quand Cérès soûffl'ye ses chorchéthons ès fielles, nou ouait les murmuthes des mârrons et m'lons, et la brîsette nos embraiche sus l'sablion. À la Saint Jean, quand nou fait braithe les peîles, lé tchuivre est tchoeuthu tout coumme les êtailes tch'êtampent les C'mîns d'Saint Jacques dans lus preinseu. Achteu lus litcheu vèrse des flieurs dé seu, et nou-s'est litchi par lé chucre des frâses. Chonmé dans la chaleu, nou bait la bliâse; transfidguthé par chutte reinchette, nou dgette des calipettes et gavottes siez les g'zettes. La valséthie dé vaques et d'vliques et d'vêpres a fliantchi grand' ouvèrtes les frits et f'nêtres. Les briques et bouais tchaient becque à barbe et dansent, et par les c'mîns nou n'vait qu'eune abondance. Nou cône eune priéthe ès dgieux et ès déêsses, ès p'tits faîtchieaux, à Mèrtchure et Cérès. La coharne brait, et les côtis saluent les corînthes, raisîns, et les belles-toutes-nues. Nos mains - un touffet d'flieurs; not' bouoche - un clios tchi tchultive des patates et d's apricots. Des dés divîns font tressonner les ros; nou sonne les ticl'yes et bachîns et nou cône. La rose mathée monte jusqu'au pid du trône; des louêmes dé lueu russellent ava les vaux où'est qu'Cérès fauche du chuchet et du saux. Les pétales dé tchoeuryi à voltilyi tchaient sus Mèrtchure et sa cônucopie.
Geraint Jennings |
Chutte poésie gângnit un prix dans la Compétition d'Poésie d's Îles d'la Manche 2004
Viyiz étout: