Les Pages Jèrriaises

Pâler d'abondance entouor l'excliusion

Pâler d'abondance entouor l'excliusion,
faithe du catchet entouor un podîn d'Noué,
dêdgêner, abrié souos l'êdrédon,
ouaithe qu'auve l'înnexpéthience nou piêsse heûqu'ter
coumme un fo. L'amont'tie du chiqu'teux gêne,
un chapé d'quat' sou tout coumme fait jadgîn
si ch'est qu'entouor lé mèrtcheux nou dêdgêne.
Ch'est sait des balivèrnes, sait du bavîn,
sait prêchi du bouôn sens. Sâcré mille pipes!
Tch'est qu'nou dithait entouor des choses pathelles?
Quand la convèrsâtion est fraide, nou s'fripe;
mais quand la caqu'téthie est caûde nou gèle.
Dêrenglyi d'excliusion ou d'podîn d'Noué;
létché des chouaix qu'ous êcout'têtes? Létché?

Geraint Jennings

 


 

(Chutte poésie fut composée en faîthant sèrvi eune pouongnie d'mots chouaîsis à Dgi l'adèrt dé d'dans l'dictionnaithe)

 

Viyiz étout:

 

Les Pages Jèrriaises