Les Pages Jèrriaises

Lé Nic dit, "Ma chiéthie, vein t'crépousser

Lé Nic dit, "Ma chiéthie, vein t'crépousser
souos l'êdrédon, j'avons touos l's îngrédgeins
pouor tchuithe un fricot bein pus caud qu'l'enfé.
Bârrons-nous dans chu liet, ma chiéthie, vein..."
"Nou-fait, ch'est du dêpaûtchage enlaidi.
Ch'n'est pon siez mé, ch'est eune maîson à louage
et j'sommes avèrtis à sorti." "Chiéthie,
chu liet est un livre, entrons dans ches pages
et j'y liêthons, êtalvachis, l'èrchette
dé l'amour înfèrna tch'y brûle et bouort.
Souos eune couvèrtuthe pitchie d'roses et g'zettes,
j'nos entr'-enhèrmél'lons à drait ou tort."
Lé Malîn fait sèrvi des mots tch'astiquent.
N'faut pon aller au liet auve lé Vièr Nic.

Geraint Jennings

 

(Chutte poésie fut composée en faîthant sèrvi eune pouongnie d'mots chouaîsis à Dgi l'adèrt dé d'dans l'dictionnaithe)

 

Viyiz étout:

 

Les Pages Jèrriaises