Les Pages Jèrriaises

Ma douoche, dêmanche-mé

Ma douoche, dêmanche-mé (ouh là là)
et chuchote-mé - un mal-apprîns
tchi rivalise tchique annima
tchi bait du sang, ou du rouoge vîn.

Auve un pronom împèrsonnel,
di-mé tan d'si du pus avant.
D'senchorchèle-mé auve eune tchênelle,
auve eune codrette cache-mé mouothant.

Fai-mé un côffre en savîngni
et un mât en méaguinné.
Ès agouîns, j'm'adréch'chai à li
et jé m'dréch'chai l'avant à té.

Nou m'avait stchulpté en tchoeu d'tchêne.
Nou dolit chu drécheux en tique.
Ma main d'tchèrpentchi pique et peîne;
tes dés d'douleu vissent, cliutent et fique,

m'ont achouêmi comme un bouôlias...
ma douoche, r'emmanche-mé (ouh là là)

Geraint Jennings

 

(Chutte poésie fut composée en faîthant sèrvi eune pouongnie d'mots chouaîsis à Dgi l'adèrt dé d'dans l'dictionnaithe)

 

Viyiz étout:

 

Les Pages Jèrriaises