Eune daûtchinne dé jouaintrolle, eune rînchette dg'hielle dé cliou...

Eune daûtchinne dé jouaintrolle, eune rînchette dg'hielle dé cliou
d'giroufl'ye, eune assiettée d'âl et d'pais êcarlates...
l's êbats et êbouhâle dêmêlés à maû r'tou:
griyiz-en un podîn rembouôrré d'hagues et dattes.

Lé m'sutheux d'angl'yes dêvîncl'ye un bathi avinné;
lé relle cartchule dèrché combein qu'ch'est en centînmes,
en êtchus et couronnes; la cannelle fait tout bé;
l'bouôrrage dêbouôrrîngue tout. Ès faches jouffliées, j'èrdînmes:

"N'nos enfaûtômez d'aut'! Ches pais d'senteu dêrengl'yent
en m'suthant vos sales triques!" La divèrsifiéthie
nos enhéthique, nos matte. Ouaithe qué Mathie la Sangli-
-euse en nyie la mémouaithe, qué j'séyons êhantchis,

les mains jouaintes en priéthe, les dgéthets êtchiêssetés -
et ch't' èrchette au Vièr Nic nos rafraîche en enfé.

(Chutte poésie fut composée en faîthant sèrvi eune pouongnie d'mots chouaîsis à Dgi l'adèrt dé d'dans l'dictionnaithe)

Un d'dans-drouaite dé jouaie, eune riole dé hippopotame dé cliu
d'moutarde, eune astérisque d'aiseté et d'paîssonnyi...
l's êbuêthie et êcalage dêmêlés à mauvais rubis:
griyiz-en un pouaint rembouôrré d'haînitchîn et d'bit.

Lé mulâtre dêvîncl'ye eune bat'lée avinnée;
lé rempliage cartchule dèrché combein qu'ch'est en cèrtificaux,
en êtendpèrques et courts-bras; l'cannîn fait tout bé;
l'bouoyau dêbouôrrîngue tout. Ès faichons jouffliées, j'èrdînmes:

"N'nos enfaûtômez d'aut'! Ches paîssonniéthes dêrengl'yent
en m'suthant vos sales troglodytes!" La d'licatesse
nos enhéthique, nos matte. Ouaithe qué l'sangli-
-eux mâtîn en nyie la mennetie, qué j'séyons êhantchis,

les si et les mais jouaints en prînma, les dgeules êtchiêssetées -
et ch't' èrcliâme au vièr nid nos rafraîche en enfroutcheuse.

Geraint Jennings

N+7: Ch'est eune gamme littéthaithe dé patholes jouée sustout par la dgaîngue d'auteurs tch'a nom Oulipo (Ouvroir de littérature potentielle). Chutte dgaîngue fait sèrvi des gammes et des règl'yes pouor l'êcrithie et la graiethie d'nouvelles formes et nouvieaux textes par lé hâsard, la transformâtion et la restriction. La transformâtion app'lée S+7 (ou N+7) change un texte en rempliaichant châque pathole tch'est granmaticalement un nom (N) d'auve eune aut' pathole tch'est un nom tchi la siet sept entrées pus bas (+7) dans l'dictionnaithe.