Les Pages Jèrriaises

En mémouère de Shakspeare

Tribut d'un rhymoeux Jerriais

I

A Shakspeares, à l'âme si pure,
Tchi viyait tant d'sermons divers
Dans chutte belle et fraich' nature,
A li ches vers.

II

A ch't-i'-là tchi de sen esprit
Pour touos temps des leçons nos sert,
Shakspear' not' maitre et notre ami,
A li ches vers.

III

O Jerriais! tch'il est bé le livre,
Tchi contetient ses noblles pensaies;
I' nos y montre comment vivre,
Et j'y somm's tous traçaies.

IV

Le bouon-homm' Lear, abandonnai,
Cachi de sa propre maison
Par ses filles, et tant maltraitai
Tchi perd raison.

V

Antonio tch'offre sa vie
Pour cautionner san jeune ami;
Le Juis tchi, remplyi de furie,
Rest' sans pitchi.

VI

Les p'tits faitchieaux et les schorchiais
Dansant au biau clié de la lune,
Et les r'venants tchi veinn'nt nos r'vais
Quant veint la brune.

VII

O notre maitre et notre ami,
Tchi nos fais bein rire et plieuré,
Jamais nou ne r'verra d'esprit,
O grand Shakspear' comme té.

 

A.A.L.G.

1864, Avril 23

 

Viyiz étout:

 

Les Pages Jèrriaises