Seigneu, tu'es l'Dgieu tchi m'sauve; niet' et jeu j't'appelle. Qu'ma priéthe veinge l'avant à té; tend tén ouothelle à m'n appel. J'sis accabâssé d'troubl'yes et ma vie hale à la mort. J'sis compté p[armi les cheins tchi d'valent dans l'creux; j'sis coumme iun sans forche. J'sis cârré acanté les morts, coumme les bliessés à mort tchi sont couochis dans la fôsse, dé tchi qu'tu n't'ramémouaithe d'aut', tchi sont copés d'tes souains. Tu m'a mîns dans l'pus bas creux, dans la pus néthe avanteu. Ta mârrisson pèse sus mé; tu m'a accabâssé atout toutes tes louêmes. Tu m'a halé touos mes pus près anmîns et m'lus a rendu haïssabl'ye. Jé sis enfreunmé et n'peut pon m'en êcapper; mes ièrs sont sombres dé douleu. J't'appelle, Seigneu, châque jour; j'aveins mes mains à té. Mouontre-té tes mèrvelles ès morts? Ch'est-i' qu'lus esprits lus r'lèvent et t'louangent? Tén amour est-i' dêcliathé dans la fôsse, ta fidélité dans la ruinne? Tes mèrvelles sont-i' connues dans la nièrcheu, ou tes faits d'justice dans l'pays d'l'oublyi? Mais jé t'crie pouor dé l'aîgue, Seigneu; l'matîn ma prièthe veint l'avant à té. Pouortchi, Seigneu, qu'tu m'èrnonche et t'muche la fache dé mé? D'pis ma jannèche j'ai souffèrt et 'té près d'la mort; j'ai suffâtchi tes êffrais et j'sis au m'sespé. Ta mârrisson a pâssé par-dessus mé; tes terreurs m'ont passecrit. Tout l'long du jour i' m'entouothent coumme eune înnondâtion; i' m'ont engaûmé. Tu'as halé d'mé m'n anmîn et man vaîthîn - la nièrcheu est ma pus près anminne.
Viyiz étout: