Qu'lé Seigneu man Rotchi sait louangi, li tchi duit mes mains pouor la dgèrre, mes dés pouor la batâle. Il est man Dgieu tch'aime, et ma fortérêsse, man renfort et man libéthateu, m'n êtchu en tchi qué j'm'abrie, tch'assujettit des peupl'yes souos mé. Seigneu, tch'est qu'i' sont l's êt' humains qu'tu les souongne, des sîmpl'yes mortels qué tu'en tcheins compte? I' sont coumme un soûffl'ye; lus jours sont coumme eune ombre tchi pâsse. Seigneu, spartis tes cieux et d'vale; touche les montangnes pouor qu'i' feunquent. Envyie d's êparts et parfène l'enn'mîn; tithe tes èrchelles et cache-les. Aveins ta main en bas d'en haut; libéthe-mé et sauve-mé d's ieaux rudes, des mains d's êtrangièrs dé tchi les bouoches sont remplyies d'menn'ties, dé tchi les mains dêtres tricachonnent. J'té chant'tai eune nouvelle chanson, man Dgieu; j'té f'thai d'la musique sus la lythe à dgiêx cordes, au Chein tchi bâle la victouaithe ès rouais, tchi libéthe san sèrvant Dâvi. Libéthe-mé du sâbre fatal; sauve-mé des mains d's êtrangiers dé tchi les bouoches sont remplyies d'menn'ties, dé tchi les mains dêtres tricachonnent. Épis nos fis dans lus jannèche s'sont coumme des pliantes bein tchultivées, et nos fil'yes coumme des pilièrs stchulptés pouor orner un palais. Nos grain'nies s'sont remplyies dé toutes sortes dé provision. Nos brébis lus multipliéthont par des milles, par des dgiêx milles dans nos clios; nos boeux hal'lont des chèrges bésantes. I' n'y'étha pon d'êcrouôl'lie d'muthâles, ni d'prendrie en prisonnyi, ni d'brais d'malheu dans nos rues. Beinheutheux est l'peupl'ye dé tchi chennechîn est la véthité; beinheutheux est l'peuple dé tchi l'Bouôn Dgieu est l'Seigneu.
Viyiz étout: