Seigneu, tu'as 'té not' démeuthe avaû les généthâtions. D'vant qu'les montangnes fûssent portées ou qu'tu'eûsse grée la tèrre et l'monde, d's âges ès âges tu'es l'Bouôn Dgieu. Tu renvyie l'humannité au ponsi, et di, "R'allez-y, mortels." Ch'est en tchi mille ans l'avant à tes ièrs sont coumme lé jour d'hièr tch'a pâssé, ou coumme un quart la niet. Tu les tâne, et ch'est coumme s'i' sont à rêver, coumme l'hèrbe tchi r'craît l'matîn; l'matîn ou r'flieuthit et r'vèrdit; l'sé ou fâne et fliêtrit. Ch'est en tchi j'sommes engaûmés par ta mârrisson, par ta futhie j'sommes achouêmis. Tu t'es présenté nos înnitchités, nos péchés s'grets dans la lueu d'ta fache. Ch'est en tchi touos nos jours lus en vont par ta grande mârrisson; et jé m'ttons fîn à nos années auve un soupi. Les jours dé nos vies sont septante années, ou ofûche huiptante si j'sommes forts assez; mais tout coumme lus duthée est raîque du travas et d'la gêne; i' pâssent quédaine, et j'nos envolons. Tchi qui comprend l'pouver d'ta mârrisson? Ta futhie est aussi grande qué la peux qué j'té d'vons. Ensîngne-nous coumme tchi compter nos jours à seule fîn qué j'piêssons gângni un tchoeu d'sagesse. Cârre-té d'ta mârrisson, et d'vant long ai pitchi d'tes sèrvants! Rassâsyie-nous l'matîn atout tén amour, à seule fîn qué j'piêssons nos rêjoui et êt' heutheurs tout l'long d'nouos jours. Rêjouis-nous auve autant d'jours qué tu nos a afflyigi, et autant d'années dans tchi qu'j'avons veu du ma. Qué tan travas sait mouontré à tes sèrvants, et tan pouver glorieux à lus êfants. Qu'la faveu du Seigneu not' Dgieu sait sus nous et faiche prospéther pouor nous l'travas d'nos mains, fai prospéther l'travas d'nos mains!
Viyiz étout: