D'livre-mé d'mes enn'mîns, oh Dgieu; sai ma fortérêsse contre les cheins tchi sont à m'attatchi. D'livre-mé des malfaiteurs et sauve-mé des cheins tchi sont souotre man sang. Êv'chîn i' cache-muchent pouor mé happer! D's hoummes féroces conspithent contre mé sans qu'j'aie offensé ni péché, Seigneu. J'n'ai rein fait d'ma, tout coumme i' sont pouor m'attatchi. Lève-té pouor m'aîdgi; èrgarde ma situâtion! Té, Seigneu Dgieu Tout-Piêssant, té tch'est l'Dgieu d'Israël, êmoûque-té pouor peunni toutes les nâtion; n'mouontre pon d'pitchi ès traîtres malîns. I' r'veinnent au sé, en ronnant coumme des tchians, et rôdent lé tou d'la ville. Èrgarde chein qu'il êcliaquent dé lus bouoches - les patholes dé lus lèvres sont aussi aidguës coumme des sâbres, et i' pensent, "Tchi qui peut nos ouï?" Mais tu'en ris, Seigneu; tu t'moque dé toutes ches nâtions. Tu'es ma forche, jé vil'ye pouor té; té, Dgieu, tu'es ma fortérêsse, man Dgieu à tchi qué j'peux m'fier. Lé Bouôn Dgieu îtha l'avant à mé et m'laîss'sa m'rêjoui des cheins tchi m'êcliandrent. Mais n'les tue pon, Seigneu not' êtchu, ou man peupl'ye oubliétha. Atout ta forche êraiche-les et pique-les bas. Pouor lé péché d'lus bouoches, pouor les patholes dé lus lèvres, qu'i' saient happés dans lus ordgi. Pouor les malédictions et menn'ties qu'i' dithent, brûle-les dans ta mârrisson, brûle-les jusqu'à ch'qu'i' s'sont passecrits. Épis tout l'monde saithont jusqu'ès buts d'la tèrre qué l'Bouôn Dgieu règen sus Jâcob. I' r'veinnent au sé, en ronnant coumme des tchians, et rôdent lé tou d'la ville. I' ravaûdent pouor du mangi, et hueûlent s'i' n'sont pon rassâsiés. Mais j'chant'tai entouor ta forche, lé matîn jé chant'tai entouor tén amour; ch'est en tchi tu'es ma fortérêsse, man r'fuge quand y'a des troubl'yes. Tu'es ma forche, jé t'chante des louanges; té, Dgieu, tu'es ma fortérêsse, man Dgieu à tchi qué j'peux m'fier.
Viyiz étout: