Man tchoeu est ravigoté par un nobl'ye thème coumme j'èrcite mes poésies pouor lé rouai; ma langue est la plieunme d'un auteu aufait. Tu'es l'pus excellent d's hoummes et tes lèvres ont 'té onguennées d'grâce, dépis qué l'Bouôn Dgieu t'as béni à janmais. Encheins tan sâbre à ta tchiêsse, té l'piêssant, habil'ye-té d'noblièche et d'majesté. En ta majesté va monté sus la véthité, l'heunmilité et la justice; qu'ta main dêtre accomplyisse des faits r'mèrquabl'yes. Qu'tes èrchelles aidguës pèrchent les tchoeurs d's enn'mîns du rouai; qu'les nâtions tchaient souos tes pids. Tan trône, oh Dgieu, enduth'tha à tout janmais; un scèpt' dé justice s'sa l'scèpt' dé tan rouoyaume. Tu'aime la justice et déteste la mauvaîtchi; Lé Bouôn Dgieu, tan Dgieu, don t'a êtablyi au d'ssus d'tes compangnons en t'onguennant d'l'hielle dé la jouaie. Toutes tes robes ont l'assenteu d'myrrhe et d'aloé et d'casse; d'palais ornés d'iviéthe la musque des cordes té rêjouit. Des fil'yes dé rouais sont parmi tes femmes honothées; à ta main dêtre et la bru rouoyale en or d'Ophir. Êcoute, fil'ye, et fai attention: oublyie tan peupl'ye et la maîson d'tan péthe. qu'lé rouai sait entchéthaûdé d'ta bieauté; honothe-lé, car il est tan seigneu. La ville dé Tythe veindra auve un présent, des riches gens té suppliéthont. Toute glorieûthe est la prîncêsse dans sa chambre; sa robe est couôsue d'or. En d's habits brodés oulle est m'née au rouai; ses fil'yes d'honneu tchi l'a accompangni la siêthent. Am'nées auve d'la jouaie et du bonheu il' entrent dans l'palais du rouai. Tes fis prendront la pliaiche dé tes péthes; tu les f'thas des prînces partout l'pays. J'pèrpétueûthai ta mémouaithe avaû toutes les généthâtions; les nâtions don t'louang'geont à tout janmais.
Viyiz étout: