Ch'est eune bouonne chose dé louangi l'Seigneu et d'faithe d'la musique à tan nom, oh Pus Haut, pouor procliâmer tén amour châque matîn et ta fidelité châque niet, sus la musique d'la lythe à dgiêx cordes et la mélodie d'la hèrpe. Ch'est en tchi tu m'fais heutheux par tes faits, Seigneu; jé chante dé jouaie pouor chein qu'tes mains ont grée. Combein grand qu'i' sont, tes faits, Seigneu, combein parfondes qu'i' sont, tes pensées! Les niaûmîns n'savent pon, les médgians n'comprannent pon, qué ouaithe qu'les malîns poussent coumme dé l'hèrbe et qu'touos les malfaiteurs flieuthissent, i' s'sont passecrits à tout janmais. Mais té, Seigneu, tu'es louangi à tréjous. Ch'est pouor lé seux qu'tes enn'mîns, Seigneu, pouor lé seux qu'i' péthithont; touos les malfaiteurs s'sont parfénés. Mais tu'êlèv'thas ma cône coumme la cheinne d'un buffl'ye, j'ai 'té arrouôsé d'finnes hielles. Mes ièrs ont veu la dêfaite dé m's advèrsaithes; mes ouothelles ont ouï lé r'tas d'mes enn'mîns malîns. Les justes flieuthithont coumme un palme, i' craîtront coumme un grand cèdre du Liban; pliantés dans la maîson du Seigneu, i' flieuthithont dans les bels dé not' Dgieu. I' portéthont acouo du frit dans lus vieillèche, i' restéthonts frais et vèrts, en procliâmant, "L'Seigneu est drait, il est man rotchi et i' n'y'a pon d'înjustice en li."
Viyiz étout: