Seigneu, ouai ma priéthe, êcoute man brai pouor lé pitchi; dans ta fidélité et ta justice, veins m'souôlagi. Né mène pon tan sèrvant au jugement, ch'est en tchi n'y'a fis d'âme tchi vit tch'est juste l'avant à té. L'enn'mîn m'pourchasse, i' m'êglianmit à la tèrre; i' m'fait d'meuther dans la nièrcheu coumme les cheins tch'ont 'té morts dépis longtemps. M'n esprit veint failli en mé; man tchoeu d'dans mé est êtchoeuthé. Jé m'souveins des jours du temps pâssé; j'médite sus touos tes faits et considéthe cheint qu'tes mains ont grée. J'aveins mes mains à té; j'ai sé pouor 'té coumme eune tèrre sitchie. Rêponds-mé quédaine, Seigneu; m'n esprit est failli. Né muche pon ta fache dé mé ou jé s'sai coumme les cheins tchi d'valent dans la fôsse. Qu'lé matîn m'apporte la nouvelle dé t'n amour tchi n'manque janmais. Ch'est en tchi jé m'fyie à té. Fai-mé connaît' lé c'mîn par iou j'dais aller. Ch'est en tchi j'confyie ma vie à té. D'livre-mé d'mes enn'mîns, Seigneu, car jé m'muche en té. Ensîngne-mé à faithe ta volanté, car tu'es man Dgieu; qu'tan bouôn Esprit m'mène sus la tèrre niv'lée. Pouor l'amour dé tan nom, Seigneu, prêsèrve ma vie; dans ta justice, èrtithe-mé d'la dêtresse! Dans ta bouonté tchi n'manque janmais, tai m's enn'mîns; dêtruis touos m's advèrsaithes, car jé sis tan sèrvant.
Viyiz étout: