Êcoute mes patholes, Seigneu, èrmèrque ma lamentâtion. Êcoute ma priéthe pouor dé l'aîgue, man rouai et man Dgieu, ch'est en tchi ch'est à té qué j'prie.
L'matîn, Seigneu, tu ouai ma vouaix; l'matîn j'pliaiche mes d'mandes l'avant à té et j'espéthe. Ch'est en tchi tu n'es pon un Dgieu tchi prend du pliaîsi dans la mauvaîtchi; siez té, les malîns n'sont pon atchilyis. Les têtouongnes né peuvent pon lus mâter l'avant à té. Tu déteste touos les chein tchi font du ma; tu dêtruis les mensongièrs! Tu déteste, oh Seigneu, les chèrcheurs dé sang et les fausseurs. Mais mé, par tan grand amour, j'peux entrer siez té. Auve eune révéthence jé m'abaîsse l'avant à tan saint templ'ye.
Seigneu! Condis-mé dans ta justice par cause dé m's enn'mîns - aplianis tan c'mîn l'avant à mé. Nou n'peut s'fier à autcheune pathole tchi sort d'lus bouche; lus tchoeu et remplyi d'malice. Lus goule est eune fôsse ouèrte, et atout lus langues i' dithent des menn'ties. Dêcliathiz-les coupabl'yes, oh Dgieu! Qu'lus întrigues amènent lus tchête! Forbannissiz-les pouor l'amas d'lus péchés, ch'est ont tchi i' lus sont révoltés contre té. Mais qu'touos les cheins tchi lus sont abriés en té saient heutheurs; qu'i' chantent à tout janmais auve d'la jouaie. Protégiz-les et les cheins tch'aiment tan nom lus rêjouiss'sont en té. Ch'est en tchi, oh Seigneu, tu bénis les justes: tu l's entouothent atout ta faveu coumme un êtchu.
Viyiz étout: