J'dis, "J'vil'lai sus mes c'mîns et gardéthai ma langue du péché; j'enmûsèl'lai ma bouoche quand j'sis dans la présence des malîns." J'restais don sans mot, sans même dithe autcheune chose dé bouôn. Mais ma gêne s'agrandissait; man tchoeu v'nait caûffé d'dans mé. Quandi qué j'méditais, l'feu brûlait; épis j'pâlis atout ma langue: "Mouontre-mé, Seigneu, la fîn d'ma vie et l'nombre dé mes jours; fai-mé assaver combein qu'ma vie s'envole. Tu m'as bailli raîque eune pouongnie d'jours, la duthée d'mes années n'est quâsiment rein l'avant à té. Tout l'monde né sont qu'un soûffl'ye, même les cheins tchi sembl'ye fèrmes. Pouor lé seux tout l'monde lus pronmènent coumme des ombres; en vaine i' lus trînmoussent pouor amouoch'ler des beins sans saver à tchi qu'i' sont à la fîn. Mais achteu, Seigneu, tch'est qué j'dai espéther? M'n espé est en té. Sauve-mé d'toutes mes contraventions; né m'fai pon la rîthelée des niaûmîns. J'tais san mot; j'n'ouvrithai pon ma bouoche, par cause qué tu'es l'chein tch'a accomplyi chennechîn. Né m'niche d'aut' dé cos; j'sis accabâssé des cos d'ta main. Quand tu lichonne et disciplyinne autcheune pèrsonne pouor lus péché tu dêtruis lus beins coumme un papillon - pouor lé seux châtchun est raîque un soûffl'ye. Êcoute ma priéthe, Seigneu, êcoute mén appel pouor dé l'aîgue; né t'dêtouônne pon d'ma plieuth'thie. Jé d'meuthe siez té coumme un horsain, un louagi coumme touos m's anchêtres. Dêtouônne dé mé tan r'gard, qué jé m'rêjouisse acouo dans la vie d'vant dé m'n'aller et qu'jé n'sai d'aut'!
Viyiz étout: