Jé t'louang'geai, Seigneu, d'tout man tchoeu; j'racont'tai touos tes faits mangnifiques, Jé s'sai heutheux et j'm'rêjouithai d'té. Jé chant'tai tan nom, Dgieu Bein Haut!
Mes enn'mîns r'broussent quémîn; i' trébuquent et péthissent l'avant à té. Ch'est en tchi tu'as souôtînt man drouait et ma cause, tu sièges sus tan trône en juste juge. Tu'as lichonné les nâtions et dêtruit l'malîn; tu'as êffachi lus nom à tout janmais. Mes enn'mîns ont 'té finnalement ruinnés, tu'as renvèrtchi lus villes; même la mémouaithe dg'ieux a 'té passecrite.
Lé Seigneu règne à tréjous; il a êtablyi san trône pouor la jug'gie. I' juge lé monde auve d'la justice, i' juge les peupl'yes êgalement. Lé Seigneu est un abri pouor les cheins tchi sont mîns bas, un abri fort en dêtresse. Les cheins tchi connaîssent tan nom lus y confient, ca té, Seigneu, tu n'as janmais abandonné les cheins tchi t'chèrchent.
Chantez les louanges du Seigneu, tch'est assis sus san trône en Sion. Publiez parmi les peupl'yes ses hauts faits! Ch'est en tchi l'chein tchi vengent lé sang ramémouaithe; i' n'oublyie pon les brais d's afflyigis.
Seigneu, vai coumme tchi qué j'sis vengi par mes enn'mîns! Ai pitchi d'mé et enlève-mé d's us d'la mort, à seule fîn qué j'piêsse dêcliather tes louanges ès us d'la fil'ye dé Sion, et m'rêjouisse là dé tan salut.
Les nâtions ont tché dans la fôsse qu'il ont creusé; lus pids sont enhèrmélés dans l'drannet qu'il' ont muchi. Lé Seigneu est connu par ses faits d'justice; les malîns sont happés par chein qu'il ont grée d'lus propres mains. Les malîns d'valent dans l'rouoyaume des morts, toutes les nâtions tch'oublyient l'Bouôn Dgieu. Mais Dgieu n'oubliétha janmais l'malheutheux, l'espéthance dé l'afflyigi né péthitha janmais.
Lève-té, oh Seigneu, n'laîsse pon triompher les mortels; qu'les nâtions saient jugis l'avant à té! Tape-les d'peux, Seigneu! Qu'les nâtions sachent qu'i' sont raîque mortelles.
Viyiz étout: