Seigneu, êcoute ma juste cause, sai attenti à man brai. Êcoute ma priéthe - ou né s'lève pon d'lèvres d'embliûtréthie. Qu'ma justice pathaîsse l'avant à ta fache; qué tes ièrs vaient chein tch'est vrai. S'tu'êprouve man tchoeu, s'tu m'examinne la niet et m'teste, tu n'trouv'thas pon en mé d'plians d'ma. Ma pensée n'est rein d'aut' qué chein qu'j'ai dit. Les gens ont êprouvé dé m'séduithe, mais s'lon la pathole dé tes lèvres jé m'tcheins en garde contre les manniéthes des brutaux. Mes pas sont asseûthés sus tes c'mîns, mes pids n'ont pon trébutchi. J't'appelle, man Dgieu, car tu m'rêponn'nas. Touônne-té l'ouothelle à mé et êcoute ma priéthe. Mouontre-mé les mèrvelles dé tan grand amour, té tcvhi sauve par ta main dêtre les cheins tchi lus abrient en té d'lus enn'mîns. Garde-mé coumme la preunelle dé tan yi; muche-mé dans l'ombre dé tes ailes des malîns tchi voudraient m'dêtruithe, dé m's enn'mîns mortels tchi m'entouothent. I' freunment lus couothée et lus bouoches pâlent rupêment. I' sont souotre mé, i' m'entouothent achteu, l's ièrs rêvilyis, pouor m'fliantchi dans l'aithe. I' sont coumme un lion affanmé pouor dêchither, un lion féroce accliutchi dans l'couvèrt. Lève-té, Seigneu, enfache-les, envyie-les bas; atout ta sâbre d'livre-mé des malîns. Par ta main sauve-mé d'ités gens, Seigneu, des cheins d'chu monde dé tchi l'gân est dans chutte vie-chîn. Qu'i' saient endgèrdgichonnés d'chein qu'tu lus as rêsèrvé; qu'lus êfants en gouâlent, et qu'i' y'en ait d's êqu'sîns pouor lus p'tchiots. Pouor dé me, dans m'n înnouothanche jé vèrrai ta fache; quand jé m'rêvil'lai, jé s'sai satisfait d'vaie t'n èrsemblianche.
Viyiz étout: