La louange t'espéthe, not' Dgieu, en Sion; à té j'accomplyithons touos nos voeux. Té tchi rêponds à la priéthe, à té tout l'monde veindront. Quand j'têmes accabâssés d'péchés, tu pardonnis nos contraventions. Heutheurs sont les cheins qu'tu chouaîsi et apprèche pouor d'meuther dans tes bels! J'sommes remplyis des bouonnes choses dé ta maîson, dé tan saint templ'ye. Tu nos rêponds auve des faits mangnifiques et justes, Dgieu not Saûveux, l'espé dé touos les buts d'la tèrre et des mers les pus au liain, tchi griyit les montangnes par tan pouver, s'étant armé auve la forche, tchi tut la hueûl'lie des mers, la hueûl'lie d'lus louêmes et l'hèrtchîn des nâtions. La tèrre entchiéthe est êmèrvilyie d'tes mèrvelles; où'est qu'la sinne dé jeu ramonte, où'est qu'l'èrvèrdie d'vale, tu somme des chants d'jouaie. Tu souongne la tèrre et l'arrouôse; tu l'enrichis abondamment. Les cannieaux du Bouôn Dgieu sont remplyis dg'ieau pouor bailli d'la graine au monde, ch'est en tchi tu l'as c'mandé. Tu trempe ses randes et nivèle ses raies, tu l'amollis atout d's achies et bénis s'n avoût. Tu couronne l'année d'tes beins, et tes hèrnais sont heunés d'abondance. Les pliaines du d'sèrt sont abreuvées, les monts sont habilyis d'jouaie. Les prés sont couèrts dé troupieaux et les vallées abriées d'fronment. I' braient d'jouaie et chantent.
Viyiz étout: