Seigneu man Dgieu, j'm'abrie en té; sauve-mé et d'livre-mé d'touos les cheins tchi m'pourchassent, ou i' m'dêchith'thont coumme un lion et m'êtril'lont sans qu'fis d'âme né m'aîgue.
Seigneu man Dgieu, si j'ai fait chenna, si y'la d'la faute sus mes mains - si j'ai r'payi m'n allié auve lé ma ou sans cause ai volé m'n enn'mîn - qué m'enn'mîn pourchasse et m'happe; qu'i' pile ma vie dans la tèrre et m'faiche dormi dans l'ponsi.
Lève-té, Seigneu, dans ta mârrisson; lève-té contre la futhie d'mes enn'mîns. Rêvil'ye-té, man Dgieu; procliâme la justice. Qu'les peupl'yes assembliés t'entouothent, quand tu siège au-d'ssus dg'ieux ès pus hauts lieux. Qu'lé Seigneu juge les peupl'yes. Rends-mé d'la justice, Seigneu, s'lon m'n înnouothanche, s'lon m'n întégrité, oh Pus Haut. Mets un tèrme à la malice des malfaiteurs et mets les justes en seûth'té - tu'es l'Dgieu juste tchi tâte l's esprits et les tchoeurs.
M'n êtchu est l'Pus Haut Dgieu tchi sauve les cheins d'tchi l'tchoeu est drait. Lé Bouôn Dgieu est un Dgieu juste, un Dgieu tchi mouontre sa mârrisson touos les jours. Si autchun n's'èrpentit pon il adguch'cha san sâbre; i' band'da s'n ar et l'mith'tha. Il a grée ses armes mortelles; il envyie d's èrchelles brûlantes.
Lé chein tchi porte lé ma, conchait l'desteurbé et donne naîssance à la d'saveugliéthie. Lé chein tchi fait eune fôsse, et la creuse, tchait dans la fôsse qu'il a fait. Lé desteurbé qu'i' causent èrtchait sus lus têtes, et la violence lus r'dévale sus l'co.
J'louang'geai l'Seigneu par cause dé sa justice; jé chant'tai les louanges du Pus Haut Dgieu.
Viyiz étout: