Heutheurs sont les cheins tchi lus d'mentent des pouôrres gens; lé Seigneu les d'livre en temps d'hèrtchîn. Lé Seigneu les protège et prêsèrve - i' sont comptés parmi les béni dans la tèrre - i' n'les livre pon au d'si d'lus enn'mîns. Lé Seigneu les souôtcheint quand i' sont au pliâtre et les r'dgéthit quand i' sont au liet malades. J'dis, "Ai pitchi d'mé, Seigneu; èrdgéthis-mé, par cause qué j'ai péché contre té." M's ennemîns dithent entouor mé malinnement, " Quand tchi qu'i' mouôrra et qu'san nom péthitha?" Quand iun dg'ieux veint m'vaie, i' pâle faussement, san tchoeu ramâsse dé l'êcliandre; épis i' s'dêhale pouor êcliandrer. Touos m's enn'mîns chuchotent ensembl'ye contre mé: il' înmaginnent lé piéthe pouor mé, en dîthant, "Un hôrribl'ye ma l'a afflyigi; il est couochi et n's'èrlév'tha janmais." Même man miyeu anmîn à tchi qu'jé m'sis fié, auve tchi qu'j'ai châré man pain, s'est touônné contre mé. Mais qu'tu'aie pitchi d'mé, Seigneu; souôlève-mé, qué j'lus r'paie. J'sai qu'tu m'aime, dépis qué m'n enn'mîn n'triomphe pon sus mé. Par cause dé m'n întégrité tu m'souôtcheins et m'mâte dans ta présence à tout janmais. Qu'lé Seigneu, l'Dgieu d'Israël, sait louangi dé siècl'ye en siècl'ye. Âmen, Âmen.
Viyiz étout: