Pouortchi, Seigneu, qu'tu reste à l'êcart? Pouortchi qu'tu t'muche en temps d'troubl'ye? Lé malîn par sén ordgi chasse les faibl'yes, tchi sont happés dans les plians qu'il înmaginne. I' craque du d'si d'san tchoeu; i' bénit l'agravé et r'nie l'Seigneu. Dans s'n ordgi l'malîn né l'chèrche pon; dans toutes ses pensées n'y'a pon d'run pouor lé Bouôn Dgieu. Ses c'mîns sont tréjous prospéthes, tes louais sont r'nonchies par li; i' rit motcheûthement d'touos ses enn'mîns. I' s'dit, "Rein n'mé châqu'tha janmais." I' juthe, "Fis d'âme né mé f'tha janmais ma." Sa bouoche est remplyie d'menn'ties et m'niches; du hèrtchîn et du ma sont souos sa langue. I' cache-muche pouor happer près des villages; dé s'n anichette i' machacre l's înnouothants. En s'gret ses ièrs èrgardent pouor ses victînmes; coumme un lion dans san couèrt i' cache-muche pouor happer. I' cache-muche pouor happer l'sans-aîgue; i' happe lé sans-aîgue et l'entraîne dans san drannet. Ses victînmes sont êglianmis, i' lus êtalvachent; i' tchaient par cause dé sa forche. I' s'dit, "Dgieu n'èrmèrquétha janmais; i' couvre sa fache et n'vait janmais." Lève-té, Seigneu! Lève ta main, oh Dgieu. N'oublyie pon les sans-aîgue. Pouortchi qu'lé malîn r'nonche lé Bouôn Dgieu? Pouortchi qu'i' s'dit, "I' n's'en d'ment'ta pon d'mé." Mais té, Dgieu, tu vai l'troubl'ye d'l'afflyigi, tu considéthe lus douleu et la prend dans ta main. Les victînmes lus r'mettent à té; tu'es l'chein tch'aîgue l'orphélîn. Bûche lé bras du malîn; d'mente-té du malfaiteux pouor sa mauvaîtchi tchi n's'sait pon autrément dêcouèrte. Lé Seigneu est Rouai à tout janmais; les nâtions péthithont d'la tèrre. Té, Seigneu, tu ouai lé d'si d'l'afflyigi; tu l'encouothage, et tu'êcoute sén appel, en d'fendant l'orphélîn et l'pilvâtchi, pouor qué des sîmpl'yes mortels dé la tèrre n'êpeûthent janmais d'aut'.
Viyiz étout: