Lé Seigneu est ma leunmiéthe et man salut - dé tchi qu'j'éthai peux? Lé Seigneu est la forche dé ma vie - dé tchi qu'jé s'sai êpeûthé? Quand les malîns lus avanchent contre me pouor mé d'vouother, ch'est m's enn'mîns et m's advèrsaithes tchi lus trébuqu'thont et lus droqu'thont. Ouaithe qu'eune armée m'assâle, man tchoeu n'étha pon d'peux; ouaithe qu'la dgèrre s'êlève contre mé, j'éthais tout coumme d'la confianche. Eune chose qué j'démande du Seigneu, ch'est raîque chennechîn qué j'chèrche: qué jé d'meuthe dans la maîson du Seigneu touos les jours dé ma vie, à seule fîn d'contemplier la bieauté du Seigneu et d'admither san templ'ye. Ch'est en tchi dans l'jour du malheu i' m'abrietha dans sa d'meuthe; i' m'much'cha dans l'abri d'sa tente sacrée et m'juqu'tha sus un haut rotchi. Épis ma tête s'sa exaltée par d'ssus des enn'mîns tchi m'entouothent; à sa tente sacrée j'sacrificiêthai auve des brais d'jouaie. Jé chant'tai et f'thai d'la musique au Seigneu. Êcoute ma vouaix quand j't'appelle, Seigneu; ai pitchi d'mé et rêpond-mé. Man tchoeu m'dit d'ta part, "Chèrche sa fache!" Jé chèrchéthai ta fache, Seigneu. N'dêtouônne pon ta fache dé mé, n'renvyie pon tan sèrvant en mârrisson; tu'as 'té m'n aîgue. N'm'envyie pon hors ni n'm'abandonne, Dgieu man Saûveux. Ouaithe qué man péthe et ma méthe m'abandonnent, lé Seigneu m'atchil'la. Ensîngne-mé tan c'mîn, Seigneu; mène-mé dans un c'mîn drait par cause des cheins tchi m'opposent. Né mé d'livre pon au d'si d'mes enn'mîns, car des fausseurs dé têmouongnage lus mâtent contre mé, à m'êcliandrer malinnement. J'ai d'la confianche en chennechîn: j'vèrrai la bouonté du Seigneu dans l'pays des vivants. Espéthe lé Seigneu; sai fort et tchoeuthu et espéthe lé Seigneu.
Viyiz étout: