J'espéthais pâciemment pouor lé Seigneu; i' s'touônnit à mé et êcoutit m'n appel. I' m'souôl'vit hors du pits lîncreux, hors du pité et du bourbyi; il êtablyit mes pids sus un rotchi et m'baillit eune pliaiche fèrme à m'tcheindre dé but. I' pliaichit eune nouvelle chanson dans ma bouoche, un cantique dé louange à not' Dgieu. Y'en a hardi tchi vèrront et honoth'thont l'Seigneu et lus fiéthont en li. Beinheutheux est l'chein tchi s'fyie au Seigneu, tchi n'èrgarde pon l's ordgilleurs, les cheins tchi lus dêtouônnent vèrs des faux dgieux. Tu'as fait, tu'as plianné, Seigneu, man Dgieu, pouor nous un tas d'mèrvelles. N'y'a autchun à compather d'auve té; si s'tais à pâler et raconter entouor tes faits, y'en éthait trop pouor les dêcliather. Tu n'voulais pon des sacrifices et des dons - mais tu'as ouvèr mes ouothelles - des dons brûlés et des victînmes contre lé péché tu né d'mandais pon. Épis j'dis, "Mé v'chîn, j'sis v'nu - ch'est êcrit entouor mé sans l'rouôlot. Jé d'sithe faithe tan d'si, man Dgieu; ta louai est dans man tchoeu." J'procliâme tes actes tchi sauvent dans la grande assembliée; jé n'chèle pon mes lèvres, Seigneu, coumme tu l'sai. Jé n'muche pon ta justice dans man tchoeu; j'pâle dé ta fidélité et t'n aîgue tchi sauve. Jé n'muche pon t'n amour et ta fidélité d'la grande assembliée. N'èrfuse pon ta mînséthicorde dé mé, Seigneu; qué t'n amour et ta fidélité m'protègent tréjous. Ch'est en tchi des troubl'yes sans nombre m'entouothent; mes péchés m'ont happé, et jé n'peux pon vaie. I' sont pus nombreurs qué les g'veux d'ma tête, et man tchoeu m'manque dédans mé. Sauve-mé grâcieûthement, Seigneu; vein quédaine, Seigneu, à m'n aîgue. Qu'touos les cheins tchi veulent mé tuer saient d'sahontés et morfondus; qu'touos les cheins tchi d'sithent ma ruinne saient dêtouônnés en disgrâce. qu'les cheins tchi m'dithent, "Aha! Aha!" saient hôrrifiés d'lus propre honte. Mais qu'touos les cheins tchi t'chèrchent lus rêjouissent et saient heutheurs en té; qu'les cheins tch'ont grande envie d'tan salut dichent tréjous, "Lé seigneu est grand!" Mais pouor dé mé, j'sis pauvre et au d'sans; qu'lé Seigneu pense tréjous à mé. Tu'es m'n aîgue et man libéthateu; tu'es man Dgieu, n'ânionne pon.
Viyiz étout: