Oh Dgieu, n'reste pon sans brit, né freunme pon tes ouïes, n'dêcârre-té pon, oh Dgieu. Vai coumme tes enn'mîns ronnent, coumme tes advèrsaithes lus lèvent les têtes. Auve d'la scouotrise i' conspithent contre tan peupl'ye; i' compliotent contre les cheins qu'tu chiéthis. "V'nons," qu'i' dithent, "achouêmithons-les coumme eune nâtion, pouor qué l'nom d'Israël né sait d'aut' ramémouaithé." D'un esprit i' compliotent ensembl'ye; i' graient eune parchonn'nie contre té - les tentes d'Édom et d's Ismaëlites, d'Moab et des Hagathiens, Guébal, Ammon, Amalek, les Philistîns auve les habitants d'Tythe. Même l'Assythie s'est r'jouaint auve ieux pouor renforchi des d'scendants d'Lot. Fai à ieuc coumme tu fis à Madgian, coumme à Sisétha, et coumme à Jabîn auprès d'la riviéthe dé Kison, tchi fûdrent abattus à Hendor et d'vîndrent coumme dé la boûse dans l'aithe. Fai qu'lus nobl'yes saient coumme Horeb et Zéeb, touos lus prînces coumme Zébah et Tsalmunah, tchi dîdrent, "Prannons pouor nos-mêmes les pâtuthages dé Dgieu." Rend-les coumme du f'nîn d'solyi, man Dgieu, coumme du fain au vent. Coumme lé feu brûle la bouaîs'sie ou eune fliambe fait fliamber les montangnes, chasse-les atout ta tempête et êffrédole-les atout t'n ôrage. Couvre lus faches dé honte, Seigneu, pouor qu'i' chèrchent tan nom. Qu'i' saient tréjous d'sahontés et au m'sespé; qu'i' saient passecrits en disgrâce. Qu'i' sachent qué té, dé tchi l'nom est l'Seigneu - qu'tu'es à tan tout seu l'Pus Haut sus toute la tèrre.
Viyiz étout: