Chantez auve d'la jouaie au Bouôn Dgieu not' forche; briyiz à haut au Dgieu d'Jâcob! Lanche la musique, tapez l'tabouothîn, jouez la hèrpe mélodgieûthe et la lythe. Sonnez la cône à la Nouvelle Leune, et quand la leune est plieine, lé jour dé not' fête; chennechîn est un c'mandement pouor Israël, un régliément du Dgieu d'Jâcob. Quand l'Bouôn Dgieu sortit contre Êgypte, i' l'êtablyit coumme eune louai pouor Joseph. J'ouîs eune vouaix înconnue dithe: "J'halis l'fardé d'lus êpaûles; lus mains fûdrent libéthées du pangni. Dans ta dêtresse tu'app'lis et j'té libéthis, jé t'rêponnis dé d'dans un nouage d'ôrage; jé t'mîns à l'êpreuve ès ieaux d'Méribah. Êcoute, man peupl'ye, et j'té dgèrnithai - si sèl'ment tu m'êcout'tais, Israël! Tu n'éthas pon d'dgieu êtrangi parmi vous; tu n'louang'geas pon autchun aut' dgieu qu'mé. J'sis l'Seigneu tan Dgieu, tchi t'emm'nis hors d'Êgypte. Ouvre ta bouoche et j'la rempliéthai. Mais man peupl'ye né m'êcout'tait pon; Israël né s'souômett'tait pon. J'les lâtchis ès affits d'lus tchoeurs têtouongnes. Si sèl'ment man peupl'ye m'êcout'tait, si Israël siêthait mes c'mîns, combein quédaine qué j'mett'tais bas lus enn'mîns et touônn'nait ma main contre lus advèrsaithes! Les cheins tchi détestent lé Seigneu lus r'hal'laient l'avant à li, et lus peunnition enduth'thait à janmais. Mais tu s'sais souongni du miyeu fronment; atout du myi du rotchi jé t'rassâsiêthai.
Viyiz étout: